رووداو دیجیتاڵ
بڕیارە سبەی فێستیڤاڵی هەنار و پاییزی هەڵەبجە دەستپێبکات. بەڕێوەبەری کشتوکاڵی شارەکە دەڵێت، ئامادەکارییەکان تەواوکراون و بەشێوەیەکی باش پێشوازی لە سەردانیکاران دەکەن.
بڕیارە سبەی پێنجشەممە، 2-11-2023، کاژێر 10:00ـی بەیانی، فێستیڤاڵی هەنار و پاییزی هەڵەبجە لە پارک و شاری یاریی هەڵەبجە دەستپێبکات و بۆ ماوەی سێ رۆژ بەردەوام بێت.
ئەمڕۆ چوارشەممە، 1ـی تشرینی دووەمی 2023، ستار مەحموود، بەڕێوەبەری کشتوکاڵی هەڵەبجە بە تۆڕی میدیایی رووداوی گوت، ئامادەکارییە سەرەکییەکانیان بۆ فێستیڤاڵەکە تەواو کردوون و بە هاوکاریی پۆلیس، ئاسایش و هاتووچۆ، رێوشوێنی پێویست گیراوەتەبەر و پێشوازی لە سەردانیکاران دەکرێت.
فێستیڤاڵەکە بە ئامادەبوونی بێگەرد تاڵەبانی، وەزیری کشتوکاڵی هەرێمی کوردستان دەست بە کارەکانی دەکات. بەڕێوەبەری کشتوکاڵی هەڵەبجە دەڵێت، 720 شوێن بۆ جووتیاران، باخەوانان و خاوەنکاران ئامادەکراون و رادەستیان کراون، بۆئەوەی پێش دەستپێکردنی فێستیڤاڵەکە بەروبوومەکانی خۆیان بگوازنەوە و دایانبنێن.
%50ی فێستیڤاڵەکە تایبەتە بە هەنار و ئەو بەرهەمە خۆماڵییانەی لەکاتی پێگەیشتندان، نیوەکەی دیکەی تایبەتە بە کاری دەستی و خواردنە کوردەوارییەکان و جگە لە هەنار، گوێزی هەورامان، توو، سرکە، هەنگوین، دۆشاو و بەرهەمەکانی دیکەی ناوچەکە نمایش دەکرێن.
ستار مەحموود دەڵێت، هاوئاهەنگییان لەگەڵ شارەوانی و هاتووچۆی هەڵەبجە کردووە بۆئەوەی ئەمساڵ کەمترین قەرەباڵخی و ئاستەنگیی هاتووچۆ بۆ سەردانیکاران دروست بێت.
هەناری هەڵەبجە بەنێوبانگە و نزیکەی نیوەی بەرهەمی هەناری هەموو کوردستان لەو پارێزگایەدایە. بەڕێوەبەری کشتوکاڵی هەڵەبجە دەڵێت، ساڵی رابردوو بەرهەمی هەناری هەڵەبجە نزیکەی 11 بۆ 12 هەزار تۆن بوو. دەشڵێت، "بەرهەمی هەناری ئەمساڵ زۆر باشە و لە دوو ساڵی رابردوو باشترە".
لە هەڵەبجە نۆ هەزار دۆنم زەویی باخی هەنار هەن، ئەگەر بەرهەم 100% بێت، ساڵانە نزیکەی 30 هەزار تۆن بەرهەم دەبێت.
فێستیڤاڵی هەنار ساڵی رابردوو 24 و 25ی ئۆکتۆبەر بەڕێوەچوو. بەگوێرەی خەمڵاندنی ئامادەکارانی فێستیڤاڵی هەنار لە ساڵی 2022، زیاتر لە 200 هەزار کەس سەردانی فێستیڤاڵەکەیان کرد و ئەمساڵ پێشبینی دەکەن، هەمان ژمارە یان زیاتر سەردانی فێستیڤاڵی هەنار لە هەڵەبجە بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ