رووداو دیجیتاڵ
وەزیری ئابووریی ئێران ئاماژە بە خراپتربوونی دۆخی گوزەرانی خەڵک لەو وڵاتە بەهۆی رێژەی بەرزی هەڵاوسان دەکات و دەڵێت، "داتەپینی ئابووری و کورتهێنانی بودجە هۆکاری سەرەکیی دۆخەکەن."
عەلی مەدەنیزادە، وەزیری ئابووریی ئێران، شەوی پێنجشەممە لە کۆتایی سەردانیدا بۆ دوورگەی کیش رایگەیاند، رێوشوێنەکان بۆ پڕکردنەوە و قەرەبووکردنەوەی کورتهێنانی بودجەی ئەو وڵاتە دەستیپێکردووە.
وەزیری ئابووریی ئێران گوتی: "لە داڕشتنی بودجەی ساڵی داهاتوودا، بە جەختکردنەوەی سەرۆککۆماری و تیمی ئابووریی حکومەت، هەوڵدەدەین ئەوەندەی دەتوانین کورتهێنانی بودجە کەم بکەینەوە، ئەویش بە کەمکردنەوەی خەرجییە ناپێویستەکانی حکومەت، بەکارهێنانی سامانە بەردەستەکان بە شێوەیەکی گونجاو و زیادکردنی داهاتەکان."
عەلی مەدەنیزادە ئاماژە بە هەوڵەکانی حکومەت بۆ چارەسەرکردنی کێشەی کورتهێنانی بودجە کرد و رایگەیاند، حکومەت دەیەوێت بەشێکی کورتهێنانەکە لە رێگەی فڕۆشتنی ماڵ و موڵکی دەزگە حکومییەکان چارەسەر بکات.
مەدەنیزادە هەروەها باسی پلانی حکومەت بۆ پەرەپێدان بە وەبەرهێنان و جێبەجێکردنی دەیان پرۆژەی گەورە لە سێکتەرە جیاوازەکانی ئێران کرد و گوتی، بەپێی پلانی وەزارەتی ئابووری و دارایی، بایی 100 ملیار دۆلار وەبەرهێنان لە پرۆژەکاندا دەکرێت.
بەپێی وەزارەتی دارایی ئێران، ئەم ساڵ ئەو وڵاتە نزیکەی 950 تریلیۆن تمەن کورتهێنانی بودجەی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ