رووداو دیجیتاڵ
رێبەری رەوتی سەدر داوای رێكخستنەوەی نێو ماڵی شیعە و واژۆكردنی "پەیماننامەی شەرەف" دەكات بۆ بەرەنگاربوونەوەی ئاستەنگە دەرەكی و نێوخۆییەكان.
موقتەدا سەدر، رێبەری رەوتی سەدر لە تویتێكدا رایگەیاندووە "لە چوارچێوەی ئەو دژایەتییە روون و راشكاوەی لەلایەن گرووپێكی هەرزەكار دژی خودا، ئایین، پێغەمبەر و یاوەرانی دەكرێت، كە هۆشیاریی دینداری و خوداپەرستييان نییە، هەوڵدەدرێت نێوبانگی شۆڕشگێڕان، پرۆسەی چاكسازی، ئایین و مەزهەبەكان ناشیرین بكەن. ئەو گرووپانە لەلایەن هێزی خراپەكاریی دەرەكی و هەندێك لە كەسایەتییەكانی نێوخۆ پشتگیری دەكرێن".
رێبەری رەوتی سەدر ئاماژەی بەوە کردووە "وای دەبینم کە زۆر گرنگە پەلە بكرێت لە رێكخستنەوەی نێو ماڵی شیعە و كۆبوونەوەی چڕ دەستپێبكرێت بۆ نووسینەوەی پەیماننامەی شەرەفی عەقائیدی و سیاسی، بەپێی پەیڕەوێكی چاكسازیی بێگەرد و بێ بەشداریی گەندەڵكاران و پاشكۆكان".
سەبارەت بەو داوایەی موقتەدا سەدر بۆ رێكخستنەوەی نێو ماڵی شیعە، وەلید عەبود، پەرلەمانتاری هاوپەیمانیی فەتح گوتی "سەدر كەسایەتییەكی نیشتمانییە و پشتگیریی دەكەین بۆ رێكخستنەوەی نێو ماڵی شیعە، سەدر داوای یەكڕیزی و چارەسەركردنی ئەو قەیرانانە دەكات كە كاریگەریی راستەوخۆیان لەسەر ئاسایشی كۆمەڵگە هەیە، لەپێناو فەراهەمكردنی ژیانێكی شكۆمەندانە بۆ هەموو هاووڵاتییانی عێراق".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ