رووداو دیجیتاڵ
گوتەبێژی وەزارەتی گواستنەوەی عێراق رایگەیاند، ئەمساڵ لە داشکاندنی پلیتەکانی گەشتکردن 2349 کەس سوودمەند بوون، لەنێویاندا 116 نیڤشکان کە رێژەی داشکاندنی پلیتەکانیان 50%ی بەهای راستەقینەی خۆی و 1024 تووشبووی شێرپەنجە هەن کە رێژەی داشکاندنیان 90%ی بەهاکەیانە.
رۆژی چوارشەممە 09-08-2023 گوتەبێژی وەزارەتی گواستنەوەی عێراق لەبارەی داشکاندنی پلیتەکانی گەشتکردن بە فڕۆکە بۆ ژمارەیەک چین و توێژ بە تۆڕی میدیایی رووداوی راگەیاند، "ژمارەی ئەو کەسانەی لەو پڕۆژەیە سوودمەند بوون 2349 کەسن، لەو ژمارەیە 116یان نیڤشکانن کە رێژەی داشکاندنی نرخی پلیتەکانیان 50%یە و 1024 تووشبووی شێرپەنجە کە رێژەی داشکاندنیان 90%ی بەهای پلیتەکانە، جگە لە 9 چاودێریکاری ئاسمانی کە رێژەی داشکاندن بۆ ئەوان 50% دەبێت."
هەروەها ئاشکرای کرد، 1200 خانەنشینیش لەو پڕۆژەیە سوودمەند بوون کە رێژەی داشکاندنی پلیتەکانیان 25% دەبێت.
گوتەبێژی وەزارەتی گواستنەوەی عێراق ئەوەشی خستەڕوو، پڕۆژەکەیان بەردەوام دەبێت کە خزمەتێکی باشی گەیاندووە بۆ ئەو توێژانەی کە زۆرینەیان کەمدەرامەت و ئەوانەی بژێویی ژیانیان زەحمەتە.
داشکاندنی بەهای پلیتەکانی گەشتکردن بۆ بەشێک لە چین و توێژەکانی عێراق بە هێڵی گواستنەوەی عێراقی لە مانگی نیسانی ئەمساڵەوە لەسەر داوای محەممەد شیاع سوودانی جێبەجێ کرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ