رووداو دیجیتاڵ
دەستەی دەستپاکیی عێراق دەڵێت، لە ئەنجامی هاوئاهەنگیکردن لەگەڵ دەسەڵاتدارانی ئوردن، رەزامەندی درا لەسەر گێڕانەوەی ئەو پارەیەی بەڕێوەبەری پێشووی دەستەی ئاڵوگۆڕی پشک و بەڵگەنامە داراییەکانی عێراقی سەر بە وەزارەتی دارایی بە "نایاسایی بردوویەتییە ئەو وڵاتە."
دەستەکە لە راگەیێندراوێکدا ئاماژەی بەوە کردووە: "رەزامەندییەکە دوای وەڵامدانەوەی داوایەکی یاسایی دێ کە فەرمانگەی گەڕاندنەوەی سەر بە دەستەی دەستپاکی پێشکێشی حکومەتی ئوردنی کرد بۆ دەستبەسەرداگرتنی سامانی گوێزراوە و نەگوێزراوەی بەرپرسە سزادراوە هەڵاتووەکە."
بەپێی راگەیێندراوی دەستەکە، "بەرپرسە هەڵاتووەکە لەلایەن دادگەی تاوانەکانی ناوەندییەوە سزای 15 ساڵ زیندانیکردنی بەپێی مادەی 316ـی یاسای سزادانی بەسەردا سەپێندراوە، هەروەها دادگەی تێهەڵچوونەوەی بەغدا/کەرخ پابەندی کردووە بە گێڕانەوەی بڕی 332 ملیۆن و 176 هەزار و 290 دینار."
دەستەی دەستپاکی دەڵێت: "دوای تۆمارکردنی سکاڵا و دەرکردنی بڕیاری کۆتایی لە دادگەی بەرایی عەممان لە بەرژەوەندیی عێراق، دەسەڵاتدارانی ئوردن رەزامەندییان نیشاندا لەسەر گەڕاندنەوەی پارە دەستبەسەرداگیراوەکان و دەستپێکردنی رێکارەکان بۆ گێڕانەوەی بۆ گەنجینەی دەوڵەتی عێراق."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ