رووداو دیجیتاڵ
وەزارەتی دادی عێراق رایدەگەیێنێت، 65 هەزار زیندانی لە گرتووخانەکانیان هەن و تاوەکو ئێستا روون نییە، چەند زیندانی بەر لێبووردنی گشتی دەکەون.
ئەحمەد لێعبی، گوتەبێژی وەزارەتی دادی عێراق، رۆژی پێنجشەممە 26-09-2024 بە تۆڕی میدیایی رووداوی رایگەیاند، نزیکەی 65 هەزار زیندانی لە گرتووخانەکانی عێراق هەن، جگە لە هەرێمی کوردستان.
پرۆژەیاسای هەمواری یاسای لێبووردنی گشتیی لە پەرلەمانە، خوێندنەوەی یەکەم و دووەمی بۆ کراوە، بڕیارە بخرێتە دەنگدانەوە.
گوتەبێژی وەزارەتی دادی عێراق دەڵێت: "بە فەرمی ئاگاداری وردەکاریی پرۆژەیاساکە نین، هەر کاتێک پەسندکرا. ئەوکات بە گوێرەی یاساکە بەرچاومان روون دەبێت، کە چەند زیندانی لێبووردنی گشتیی دەیگرێتەوە".
پرۆژەیاسای هەمواری یاسای لێبووردنی گشتی، داواکارییەکی سەرەکی سوننەکانە، لە کارنامەی حکومەتەکەی محەممەد شیاع سوودانییە. پەرلەمانی عێراق خوێندنەوەی یەکەم و دووەمی بۆ کردووە، تەنیا دەنگدانی ماوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ