هەڵەیەک روویدا! دووبارە هەوڵبدە
![لۆگۆی حکومەتی هەرێمی کوردستان [لای راست] و عێراق.](https://www.rudaw.net/s3/rudaw.net/ContentFiles/954144Image1.jpg?version=8724420&mode=crop&quality=100&scale=both&w=1920&h=1200 "لۆگۆی حکومەتی هەرێمی کوردستان [لای راست] و عێراق.")
رووداو دیجیتاڵ
بڕیارە ئەمشەو شاندێکی حکومەتی هەرێمی کوردستان بەرەو بەغدا بەڕێبکەون، بە مەبەستی گفتوگۆکردن لەسەر جێبەجێکردنی سیستمی (ئەسیکۆدا) و گەیشتن بە لێکتێگەیشتنێکی تەواوەتی لەسەر پرسی دەروازە سنوورییەکان.
رۆژی دووشەممە، 27ـی نیسانی 2026، ئەندامێکی شاندەکە بە تۆڕی میدیایی رووداوی راگەیاند: "بڕیارە ئەمشەو بڕۆینە بەغدا و سبەی لەگەڵ لایەنە پەیوەندیدارەکانی حکومەتی عێراق کۆببینەوە. تەوەری سەرەکیی کۆبوونەوەکەش پرسی سیستمی ئەسیکۆدا و لایەنە تەکنیکییەکانی و رادەستکردنی داهاتی دەروازە سنوورییەکان دەبێت."
شاندەکەی هەرێمی کوردستان لە بەڕێوەبەری گشتیی گومرگی هەرێمی کوردستان و نوێنەرانی وەزارەتەکانی بازرگانی، پیشەسازی، کشتوکاڵ و وەزارەتی ناوخۆ پێکدێت.
ئەم هەنگاوە لە کاتێکدایە کە پێشتر هەوڵەکان بۆ چارەسەرکردنی ئەم پرسە گەیشتبوونە "قۆناخێکی باش". رۆژی 08ـی نیسان، سامی جەلال، راوێژکاری وەزارەتی ناوخۆی هەرێمی کوردستان بە رووداوی راگەیاند کە هەولێر و بەغدا لەسەر جێبەجێکردنی سیستمەکە گەیشتوونەتە رێککەوتن و تێیدا هەموو یاسا و تایبەتمەندییەکانی هەرێمی کوردستان رەچاو کراون.
سیستمی ئەسیکۆدا، سیستمێکی ئەلیکترۆنییە بۆ بەستنەوەی دەروازە و کاروباری گومرگی، مامەڵەی بازرگانیی کۆمپانیاکان لە عێراق و هەرێمی کوردستان رێکدەخات.
17ـی ئاداری 2026، مەسرور بارزانی، سەرۆکی حکومەتی هەرێمی کوردستان لە کۆنفرانسێکی رۆژنامەڤانیدا لەبارەی سیستمی ئەسیکۆدا بە رووداوی گوت: "ئەوەی لەسەر هەرێمی کوردستان پێویستە ئێمە رەزامەندییمان دەربڕیوە و رازیش بووین بەوەی کە سیستمەکە لە هەرێمی کوردستان جێگیر بکرێت، بەڵام میکانیزمی جێبەجێکردنەکەی دەبێت بە رێگەی دامەزراوەکانی هەرێمی کوردستانەوە بێت، ئەمەش کاتی دەوێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ