هەڵەیەک روویدا! دووبارە هەوڵبدە
رووداو دیجیتاڵ
لیژنەیەکی وەزارەتی کۆچ و کۆچبەرانی عێراق، لێکۆڵینەوەى لە دۆسیەی 8 لەو 9 بەربژێرە کردووە، کە خۆیان بۆ کورسیی کۆتای کوردی فەیلی بۆ پەرلەمانی عێراق بەربژێر کردووە.
27ى تەممووزى 2025، عەلی جەهانگیر، گوتەبێژی وەزارەتی کۆچ و کۆچبەرانی عێراق بە تۆڕی میدیایی رووداوی راگەیاند، هەفتەی رابردوو لیژنەی تایبەتی وەزارەتەکەیان لێکۆڵینەوەی لە دۆسیەی چوار لەو بەربژێرانە کردووە و چاوپێکەوتنیان لەگەڵ کردوون، ئەمڕۆش چاوپێکەوتن لەگەڵ چوار بەربژێری دیکە کراوە و تەنیا یەک بەربژێر ماوە.
بەگوێرەی یاسای هەڵبژاردنی پەرلەمانی عێراق، لە پارێزگای واست یەک کورسیی کۆتای پەرلەمانی عێراق بۆ کوردی فەیلی تەرخانکراوە.
عەلی جەهانگیر، کە سەرۆکی لیژنەکەی وەزارەتی کۆچ و کۆچبەرانیشە، رایگەیاند: "لێکۆڵینەوە لە دۆسیەی ئەو بەربژێرانە بۆ ئەوەیە کە بەڵگەنامەی پێویست پێشکێش بکەن و بیسەلمێنن کوردی فەیلین، دوای یەکلاییکردنەوەی دۆسیەکەیان، کۆمیسیۆنی باڵای سەربەخۆی هەڵبژاردنەکان ئاگادار دەکەینەوە لە دروستیی ئەوەی کە کوردی فەیلین یان نا، ئەو 8 بەربژێرەى لێکۆڵینەوە لە دۆسیەکانیاندا کراوە پەسند کراون بۆ ئەوەى ببنە بەربژێر."
9 کورسیی پەرلەمانی عێراق وەک کۆتا بۆ پێکهاتەکانی کوردی فەیلی، ئێزدی، کریستیان، سابیئەی مەندائی و شەبەک دیاریکراون، کە براوەیان لەسەر بنەمای بەدەستهێنانی زۆرترین دەنگ لەنێو بەربژێرانی پێکهاتەکەدا دەبێت.
رۆژی 11ی تشرینی دووەمی 2025 وەک وادەی هەڵبژاردنی پەرلەمانی عێراق دیاریکراوە، کە تێیدا هەر پارێزگایەک بازنەیەکی هەڵبژاردنە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ