رووداو دیجیتاڵ
محەممەد شیاع سوودانی، هانی هەمووان دەدات بەشداریی پرۆسەی هەڵبژاردنی پەرلەمانی عێراق بکەن و گوتی، بەشدارینەکردن بە واتای رێگەدانە بە گەڕانەوەی گەندەڵی و شکستهێنانە بۆ دروستکردنەوەی پشێوی.
ئەمڕۆ چوارشەممە، 29ـی تشرینی یەکەمی 2025، محەممەد شیاع سوودانی، سەرۆکوەزیرانی عێراق، لە دیوەخانی شێخ لەیس جەفات جیاد ئال شەعلان لە پارێزگای موسەننا، لەگەڵ شێخ و کەسایەتییە دیارەکان، کەسانی ئەکادیمی و کۆمەڵایەتیی عەشیرەتی زەوالیم کۆبووەوە.
سەرۆکوەزیرانی عێراق لە کۆبوونەوەکەدا جەختی لەوە کردەوە، "هەڵبژاردنێکی گرنگمان لەپێشە و گەلەکەشمان بڕیار دەدات کێ لە رێگەی دەنگدان لە هەڵبژاردنێکی باشەوە دەسەڵات بگرێتە دەست."
سوودانی کە هاوکات سەرلیستی هاوپەیمانیی ئاوەدانکردنەوە و گەشەپێدانە لە بازنەی بەغدا، دووپاتیکردەوە، "پێویستە بەشداری لە هەڵبژاردنەکاندا فراوان بێت و دوورکەوتنەوە لێی بە واتای لەدەستدانی مافی هاووڵاتی دێت لە داڕشتنی داهاتووی سیاسیی عێراقدا."
هەروەها روونی کردەوە، "بەشدارینەکردن بە واتای رێگەدانە بە گەڕانەوەی هێزەکانی گەندەڵی و شکستهێنان بۆ دروستکردنەوەی پشێوی و بەڕێوەبردنێکی خراپ."
سەرۆکی هاوپەیمانیی ئاوەدانکردنەوە و گەشەپێدان باسی لەوەش کرد، "پڕۆژەکەمان دید و میتۆدێکی هەیە بۆ بنیاتنانی دەوڵەتێک کە لەسەر بنەمای خزمەتکردنی گەلەکەی بێت." هەروەها ئاماژەی بەوەدا، "سێ ساڵە دەستمان بە کارکردن کردووە بۆ دابینکردنی داواکارییە سەرەکییەکانی گەلەکەمان و بەردەوام دەبین لە جێبەجێکردنی پڕۆژەکەمان."
جەختیشی لەوە کردەوە، "لە سێ ساڵی تەمەنی حکومەتەکەماندا لەسەر بنەمای کارکردن، دوور لە چەواشەکاری، درۆ، شێواندن و ژاوەژاو، کارمان کردووە." ئاماژەی بەوەشدا، "ژمارەیەکی زۆر پڕۆژە دەستیان پێ کردووە کە هەلی کار بۆ گەنجەکانمان دابین دەکات و ئابووریی نیشتمانیش بەهێز دەکات."
هەڵبژاردنی خولی شەشەمی پەرلەمانی عێراق لە 11ی تشرینی دووەمی 2025 دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ