رووداو دیجیتاڵ
گوتەبێژی بەڕێوەبەرایەتیی بەرگریی شارستانیی پارێزگای نەینەوا دەڵێت، ئێسک و پرووسکی ئەو 11 کەسەی کە دوێنێ لە یەکێک لە ناوچەکانی موسڵ دۆزرایەوە، رادەستی دادپزیشکی بەغدا کرا بۆ ئەوەی پشکنینی (DNA) بۆ کەسوکاریان بکرێت و دواتر رادەستیان بکرێتەوە.
رۆژی سێشەممە، 31-10-2023، موعەممەر سلێمان مەحموود، گوتەبێژی بەڕێوەبەرایەتیی بەرگریی شارستانیی پارێزگای نەینەوا بە تۆڕی میدیایی رووداوی راگەیاند، "دوێنێ دووشەممە لەژێر باڵەخانەیەکی رووخاو لە ناوچەی مەیدانی شاری موسڵ، تیمەکانمان ئێسک و پرووسکی 11 کەسیان دۆزییەوە کە ئێسک و پرووسکی کەسانێکن لە سەردەمی شەڕی داعشدا کوژراون".
موعەممەر سلێمان مەحموود گوتی، "ئێسک و پرووسکی ئەو 11 کەسەمان بۆ دادپزیشکی بەغدا نارد بۆ ئەوەی پشکنینی (DNA)یان بۆ بکرێت و دوای ئەوەی ئەنجامەکانمان پێدەگاتەوە، ئەو ئێسک و پرووسکە رادەستی کەسوکاریان دەکرێتەوە."
گوتەبێژی بەڕێوەبەرایەتیی بەرگریی شارستانیی نەینەوا ئاماژەی بەوەشکرد، هێشتا روون نییە ئەوانە ئێسک و پرووسکی هاووڵاتیی سڤیلن یان چەکداری داعش بوون و لە بۆردووماندا کوژراون.
لە حوزەیرانی ساڵى 2014دا رێکخراوى داعش شارى موسڵی کۆنترۆڵکرد و دواتریش چەند ناوچەیەکى لە کەرکووک، سەڵاحەدین، دیالە و ئەنبار کۆنترۆڵ کرد، بەر لەوەى لە ساڵى 2017 پێشمەرگە و هێزە عێراقییەکان سەرجەم ئەو ناوچانەیان بە تەواوى لەژێر دەستیدا بوون، دەربهێننەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ