رووداو دیجیتاڵ
دوایین زانیارییەکان لەبارەی پێکدادانەکانی نێوان هێزەکانی سووریای دیموکرات (هەسەدە) و هێزەکانی سەربە حکومەتی سووریا ئاماژە بە بەردەوامیی گرژییەکان دەکەن، هەرچەندە لە ماوەی 24 کاژێری رابردوودا هەسەدە لە بەشێک لە ناوچەکان کشاوەتەوە.
لە 24 بۆ 48 کاژێری رابردوودا، شەڕ و پێکدادانەکان لە گوندەواری رۆژهەڵاتی حەلەب، دەوروبەری شاری تەبقە لە پارێزگای رەقە و کێڵگە نەوتییەکانی نزیک ئەو ناوچانە چڕبوونەتەوە. هەردوولا باس لە پێکدادانی سەخت دەکەن بە بەکارهێنانی تۆپ، چەکی سووک و درۆن، بەڵام شەڕەکە لە هەموو بەرەکاندا فراوان نییە.
ناوچە سەرەکییەکان و بانگەشەی هەردوولا
دێر حافر و مەسکەنە لە گوندەواری رۆژهەڵاتی حەلەب:
• هێزەکانی حکومەتی سووریا دەڵێن، دوای کشانەوەی هەسەدە، تەواوی ناوچەکەیان کۆنترۆڵ کردووە و سوپا سەرقاڵی پووچەڵکردنەوەی مین و پێشڕەوییە.
• هەسەدە حکومەت بە پێشێلکردنی رێککەوتنی کشانەوە تۆمەتبار دەکات و دەڵێت پێش ئەوەی کشانەوەکە تەواو بێت، سوپا هێرشی کردووەتە سەریان، ئەمەش بووەتە هۆی ئەوەی بەشێک لە شەڕڤانانیان گەمارۆ بدرێن یان بکەونە دۆخێکی سەختەوە.
• گرنگیی ناوچەکە: ئەم ناوچانە دەروازەی ستراتیژین لە رۆژهەڵاتی حەلەبەوە بەرەو رووباری فورات. کۆنترۆڵکردنیان یارمەتی حکومەت دەدات رێڕۆی گەیشتن بە ناوچەکانی بەڕێوەبەرایەتیی خۆسەر مسۆگەر بکات.
شاری سەورە و بەنداوەکە
• سوپای عەرەبیی سووریا دەڵێت، دەستی بەسەر شاری سەورە و بەنداوی فورات (گەورەترین بەنداوی سووریا)دا گرتووە و هێزەکانیان چوونەتە نێو شارەکە. راپۆرتەکان باس لە پێکدادان لە نزیک ناوەندی شارەکە و بازنەی کەنیسەکە دەکەن.
• هەسەدە دەڵێت پێکدادانی سەخت لە باشووری سەورە (لە دەرەوەی ئەو ناوچانەی بۆ کشانەوە دیاریکرابوون) بەردەوامە و حکومەت بە پێشێلکاری و پێشڕەویی پێشوەختە تۆمەتبار دەکات. هەروەها لە ناوچەکانی رەقە قەدەخەی هاتووچۆی راگەیاندووە.
• گرنگییەکەی: سەورە و بەنداوەکەی سەرچاوەی سەرەکیی ئاو، کارەبا و ئاودێریشن بۆ سووریا. ناوچەکە کێڵگەی نەوتی سەورەی لێیە و کۆنترۆڵکردنی واتە دەستگرتن بەسەر داهاتی ئابووری و پێگەی ستراتیژیی رووبارەکەدا.
دێرەزوور و منبج
• تۆپباران و پێکدادانی پچڕپچڕ لە چەندین شوێنی رۆژئاوای رووباری فورات بەردەوامە. رۆژئاوا بەدەست حکومەت و رۆژهەڵات بەدەست هەسەدەوەیە. هەندێک راپۆرتی خۆجێیی باس لە پێشڕەویی حکومەت و هۆزە عەرەبەکان لە دژی هەسەدە دەکەن، بەڵام لە 24 کاژێری رابردوودا گۆڕانکاریی گەورە رووینەداوە.
• گرنگییەکەی: دێرەزوور بەهۆی سەرچاوە نەوتییەکانەوە خاڵێکی هەستیارە. منبجیش بۆ رێڕۆی بازرگانیی باکوور گرنگە.
مەنسوورە و دەوروبەری
هێزەکانی سوپای سووریا رایانگەیاند، چوونەتە نێو شارۆچکەی مەنسوورە و کۆنترۆڵیان کردووە، هاوکات دەستیان بەسەر چەندین پێگەی نزیک لە شارۆچکەکەدا گرتووە، لەوانە سەربازگەی هەجانە، بەنداوی مەنسوورە (بەنداوی بەعسی پێشوو) و گوندەکانی رەتلە و حەمام. حکومەت دەڵێت ئەمە بەشێکە لە پێشڕەوییەکانیان بەرەو تەبقە، دوای کشانەوەی هێزەکانی هەسەدە لە حەلەب.
دیمەن و راپۆرتە میدیاییەکان هەبوونی هێزەکانی حکومەت لەنێو شارۆچکەکە پیشان دەدەن، لە بەشێک لە دیمەنەکاندا دانیشتووانی عەرەبی ناوچەکە ئاهەنگ دەگێڕن و دروشم و ئاڵاکانی هەسەدە لەسەر بارەگاکان لادەبەن. سوپا دەڵێت ئاسایشی ناوچەکەی جێگیر کردووە و بەرەو فڕۆکەخانەی سەربازیی تەبقە و ناوچەکانی دیکەی وەک رەجم غەزال و زور شەممەر پێشڕەوی دەکات.
وەڵامی هەسەدە
هەسەدە رەتیدەکەنەوە کۆنترۆڵی مەنسوورەیان بە تەواوی لەدەستدابێت. هەسەدە دەڵێت، ناوچەکەیان لە "شانە" و دزەپێکەران پاککردووەتەوە و هێزەکانیان لە پێگەکانیان ماونەتەوە.
هەروەها سەرچاوەکانی هەسەدە باس لەوە دەکەن کە کۆنترۆڵی بەشێکی ناوچەکەیان گرتووەتەوە یان پاراستوویانە، بەتایبەتی دوای جووڵەی خێرا لە کاتێکدا درۆنەکانی تورکیا دیار نەبوون. هەسەدە بانگەشەکانی حکومەت بە "زیادەڕۆیی" وەسف دەکات و دەڵێت شەڕ لە باشوور و رۆژئاوای تەبقە (بە کێڵگە نەوتییەکانەوە) بەردەوامە و ئەو ناوچانە بەشێک نین لە هیچ رێککەوتنێکی کشانەوە.
راگەیێندراوەکانی هەردوو لا ئاماژە بەوە دەکەن شەڕ و پێكدادانی پچڕپچڕ و تۆپباران لە ناوچەکەدا هەیە. بۆ کۆنترۆڵکردنی دۆخەکەش، هەسەدە لە تەبقە، مەنسوورە و جەرنیە قەدەخەی هاتووچۆی راگەیاندووە.
گرنگیی ستراتیژیی مەنسوورە
هەرچەندە مەنسوورە شارۆچکەیەکی بچووکە، بەڵام گرنگییەکی ستراتیژیی هەیە:
• دەکەوێتە سەر رێگەکانی رۆژئاوای رەققە و نزیکەی 20 بۆ 30 کیلۆمەتر لە تەبقەوە دوورە.
• کۆنترۆڵکردنی یارمەتیی حکومەت دەدات گەمارۆی سەر شاری تەبقە، بەنداوەکە و فڕۆکەخانەکە و کێڵگە نەوتییەکانی ناوچەکە تووندتر بکات.
• هاوشێوەی تەبقە، دەکەوێتە دۆڵی فورات کە بۆ سەرچاوەی ئاو، کشتوکاڵ و نەوت گرنگە و هێڵی گەیشتنی هەسەدە بە رۆژئاوای رووبارەکە دەبڕێت.
• زۆرینەی دانیشتووانی ناوچەکە عەرەبن، بۆیە پێشڕەویی حکومەت دەکرێت ببێتە هۆی راکێشانی پشتیوانیی هۆزەکان لە دژی هەسەدە، ئەمەش گوشاری سیاسیی زیاتر دروست دەکات.
پردەکان
سوپای عەرەبیی سووریا، هەسەدە تۆمەتبار دەکات بەوەی لە ماوەی 24 کاژێری رابردوودا "بە مەبەست" چەند پردێکی سەرەکیی سەر رووباری فوراتیان لە ناوچەی رەقە تەقاندووەتەوە.
• پردی رەشیدی نوێ (پردی نوێی رەققە): میدیای فەرمیی سووریا دەڵێت هەسەدە پردەکەی تەقاندووەتەوە. وێنە و ڤیدیۆی میدیای نزیک لە حکومەت، پردەکە بە رووخاوی یان زیانلێکەوتوویی نیشان دەدەن و دەڵێن ئامانج لێی رێگریکردن بووە لە پێشڕەویی هێزەکانی سوپا بۆ نێو شارەکە.
• پردی کۆن (پردی کۆنی رەققە): سەرچاوەکانی حکومەت ئاماژە بەوە دەکەن بەرەبەیانی ئەمڕۆ یان درەنگی شەو هەسەدە ئەم پردەشی تەقاندووەتەوە. گوایە ئەمە بووەتە هۆی بڕانی تەواوەتیی ئاوی شاری رەققە، چونکە بۆرییە سەرەکییەکانی ئاو بەو پردەدا تێدەپەڕین و لەگەڵ تەقینەوەکەدا تێکشکاون.
• پردەکانی دیکە: راپۆرتەکان باس لەوە دەکەن هەسەدە سێ پردی لە گوندەواری رۆژهەڵاتی حەلەب تێکداوە. هەروەها هەوڵی تەقاندنەوەی پردی (شوعەیب زیکر)ی لە گوندەواری رۆژئاوای رەققە داوە، بەڵام سوپای سووریا دەڵێت هێزە تایبەتەکانیان کۆنترۆڵی پردەکەیان کردووە پێش ئەوەی بتەقێندرێتەوە و هۆشداریشیان داوە کە هەر تەقینەوەیەک "رێککەوتنەکە تێکدەدات و لێکەوتەی مەترسیداری دەبێت."
تۆمەتەکانی حکومەت و وڵامی هەسەدە
سوپا و میدیای فەرمیی سووریا ئەم کارانە بە "تیرۆر" و "تێکدانی ژێرخانی گشتی" ناو دبەن و دەڵێن هەوڵێکە بۆ رێگریکردن لە جێبەجێکردنی رێککەوتنەکانی کشانەوە و پێشڕەویی سوپا بەرەو رەققە و تەبقە. ئەوان دەڵێن ئەمە تەنیا "کات کوشتنە" پێش لەدەستدانی کۆنترۆڵی رۆژئاوای فورات و پاساویشە بۆ راگەیاندنی ناوچەکە وەک ناوچەی سەربازی.
تاوەکو ئێستا هەسەدە بە فەرمی و راستەوخۆ رەت یان پشتڕاستی نەکردووەتەوە کە ئەو پردانەی تەقاندبێتنەوە.
گرنگیی ستراتیژیی پردەکان
• خاڵی پەڕینەوەی سەرەکین لەنێوان بەرەی رۆژئاوا و رۆژهەڵات.
• تەقاندنەوەیان گواستنەوەی هێز و کەرەستەی قورس بۆ نێو رەقە بۆ سوپا سەخت دەکات (هەرچەندە سوپا دەڵێت دەتوانێت بەنداوەکان یان بەلەم بۆ پەڕینەوە بەکاربهێنێت).
• لەڕووی سەربازییەوە کات بە هەسەدە دەدات تاوەکو لە رۆژهەڵاتی رووبارەکە خۆی رێکبخاتەوە، بەڵام گرژییەکان زیاد دەکات چونکە حکومەت وەک نەمانی دەرفەتی چارەسەری ئاشتیانە سەیری دەکات.
کاردانەوەکان
• حکومەتی سووریا دەڵێت، هەسەدە "خۆی رێکدەخاتەوە"، درۆن بەکاردەهێنێت و بەپێی رێککەوتنەکان نەکشاوەتەوە. حکومەت ناوچەکانی بە "ناوچەی سەربازیی داخراو" ناساندووە بۆ پاساوی پێشڕەوییەکانی و داوا لە هەسەدە دەکات بە تەواوی بۆ رۆژهەڵاتی فورات بکشێتەوە.
• هەسەدە: جووڵەکانی حکومەت بە "ناپاکی" و پێشێلکردنی ئاگربەست ناودەبات و دەڵێت هێرشەکان ئەو ناوچانەشی گرتووەتەوە کە نابێت بکرێنە ئامانج. هەسەدە هۆشداری دەدات کە لەدەستدانی ئەو ناوچانە مەترسی لەسەر زیندان و کەمپەکانی دەستبەسەرکردنی داعش دروست دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ