هەڵەیەک روویدا! دووبارە هەوڵبدە
رووداو دیجیتاڵ
پارتی مەملەکەت لە کۆنفرانسێکی رۆژنامەڤانیدا بەربژێربوونی موحەڕەم ئینجە، سەرۆکی پارتەکەی بۆ پۆستی سەرۆککۆماری تورکیا راگەیاند.
دوای ئەوەی رۆژی یەکشەممە 12-3-2023 پرۆسەیەکی دەنگدان لە سەرکردایەتیی پارتی مەملەکەت بەڕێوەچوو، موحەڕەم ئینجە، سەرۆکی پارتەکە بەربژێرکرا بۆ پۆستی سەرۆککۆماری تورکیا.
ئیپەک ئۆزکاڵ، گوتەبێژی پارتی مەملەکەت لە کۆنفرانسێکی رۆژنامەڤانیدا راگەیاند: "105 هەزار و 326 کەس لە جەماوەرانی پارتی مەملەکەت مافی دەنگدانیان بەدەستهێنا. بە کۆی دەنگ بەڕێز موحەڕەم ئینجە، سەرۆکی گشتیی پارتەکەمان هەڵبژێردرا بۆ ئەوەی ببێتە بەربژێر پۆستی سەرۆککۆماری تورکیا کە بڕیارە رۆژی 14-5-2023 بەڕێوەبچێت."
موحەڕەم ئینجە بەر لەوەی وەکو بەربژێری پارتی مەملەکەت رابگەیێندرێت، لە کۆنفرانسێکی رۆژنامەڤانیدا وەڵامی میدیاکانی دایەوە و جەختیکردەوە کە ئەتاتورک "هێڵی سووری" پارتەکەیانە و هەموو ئەو لایەنانەی بۆ رێککەوتن و سازان رەتکردنەوە کە کێشەیان لەگەڵ ئەتاتورک هەیە.
ئینجە: هوداپار هێندەی پەکەکە مەترسیدارە
لە وەڵامی پرسیارێکی دایەوە سەبارەت بە هوداپار کە رۆژی شەممەی رابردوو پشتگیریی خۆی بۆ رەجەب تەیب ئەردۆغان، سەرۆککۆماری تورکیا راگەیاند. ئینجە گوتی: "هوداپار زۆر مەترسیدارە. زۆر بە مەترسیداری دەزانم. هێندەی پەکەکە بە مەترسیداری دەزانم."
پارتی مەملەکەت کە زۆربەی ئەندام و لایەنگرانی لە جەهەپە جیابوونەتەوە، ئێستا خاوەنی دوو کورسییە لە پەرلەمانی تورکیادا. هەریەک لە حوسەین عەونی ئاکسۆی لە بازنەی کارابوک و ئۆزجان ئۆزەل لە بازنەی یاڵۆڤا پەرلەمانتاری پارتی مەملەکەتن. ئەو پارتە کە پێشتر لە سەروبەندی راگەیاندنی هاوپەیمانییەک بوو لەگەڵ پارتی زافەر، بەڵام هەفتەیەک لەمەوبەر دەستی لەو هاوپەیمانییە کێشایەوە.
موحەڕەم ئینجە کێیە؟
- 4ی ئایاری 1964 لەدایکبووە.
- خوێندنی بنەڕەتی و دواناوەندیی لە پارێزگای یاڵۆڤا تەواوکردووە.
- بەشی فیزیای لە زانکۆی باڵیکەسیر تەواوکردووە.
- مامۆستای فیزیا بووە.
- ساڵی 2002 بە پەرلەمانتاری جەهەپە هەڵبژێردرا.
- ساڵی 2007 جارێکی دیکە هەڵبژێردرایەوە.
- ساڵی 2015 وەکو پەرلەمانتاری جەهەپە بۆ سێیەم جار هەڵبژێردرایەوە.
- ساڵی 2018 بەربژێری جەهەپە بوو بۆ سەرۆکایەتیی کۆماری تورکیا، بەڵام دەرنەچوو.
- 8ی شوباتی 2021 بە فەرمی دەستلەکارکێشانەوەی خۆی لە جەهەپە راگەیاند.
- 17ی ئایاری 2021 پارتێکی نوێی بەناوی "مەملەکەت" راگەیاند.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ