تورکیا
کۆبوونەوەکە لە کاتێکدایە تۆم باراک رایگەیاندووە، کار بۆ "یەکگرتن"ی هەسەدە و سوپای سووریا دەکەن.
رووداو دیجیتاڵ
وەزیری بەرگریی تورکیا لە ئەنقەرە لەگەڵ نێردەی تایبەتی ئەمریکا بۆ کاروباری سووریا کۆبووەوە. کۆبوونەوەکە لە کاتێکدایە تۆم باراک رایگەیاندووە، کار بۆ "یەکگرتن"ی هەسەدە و سوپای سووریا دەکەن.
بەگوێرەی راگەیێندراوی وەزارەتی بەرگریی تورکیا، ئەمڕۆ هەینی 16-01-2026، یاشار گولەر، وەزیری بەرگریی تورکیا پێشوازی لە تۆم باراک، باڵیۆزی ئەمریکا لە ئەنقەرە و نێردەی تایبەتی ئەو وڵاتە بۆ کاروباری سووریا کرد.
لە راگەیێندراوەکەدا ئاماژە بەوە کراوە، سەلچوک بایراکتارئۆغڵو، سوپاسالاری تورکیاش لە کۆبوونەوەکەدا ئامادە بووە، بەڵام هیچ زانیارییەک لەبارەی نێوەڕۆکی گفتوگۆکان و ئەنجامی کۆبوونەوەکە بڵاونەکراوەتەوە.
ئەم دیدارە هاوکاتە لەگەڵ پەیامێکی تۆم باراک لە تۆڕی کۆمەڵایەتیی ئێکس (X) کە رایگەیاندبوو: "ئەمریکا شەو و رۆژ کار دەکات بۆ هێورکردنەوەی بارودۆخەکە و رێگریکردن لە زیادبوونی گرژییەکان لە سووریا."
نێردە تایبەتەکەی ئەمریکا ئاشکراشی کردبوو، کار دەکەن بۆ "گەڕانەوە بۆ گفتوگۆکانی یەکگرتن لە نێوان حکومەتی سووریا و هێزەکانی سووریای دیموکرات (هەسەدە)."
هەوڵە دیپلۆماسییەکان لەکاتێکدان، سوپای سووریا هێزی زیاتری لە نزیک ناوچەکانی ژێر دەسەڵاتی هەسەدە، بەتایبەت لە دێر حافر و مەسکەنە کۆکردووەتەوە؛ هەسەدەش چەند جارێک هۆشداری لە ئەگەری رووبەڕووبوونەوەی سەربازی داوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ