سێڤییا
رووداو دیجیتاڵ
یانەی سێڤییای ئیسپانی مێژووییەکی گەورەی لەسەر ئاستی ئەوروپا تۆمارکرد و بۆ جاری حەوتەم لە مێژوویدا نازناوی یۆرۆپالیگی بردەوە.
لە یاریی کۆتاییدا کە لە یاریگەی پوشکاش ئارێنا لە هەنگاریا بەڕێوەچوو، هەردوو یانەی سێڤییای ئیسپانی و رۆمای ئیتاڵی رووبەڕووی یەکبوونەوە، یانە ئیسپانییەکە بەلێدانەکانی یەکلاکەرەوە یارییەکەی بردەوە.
لە خولەکی 35 پاوڵۆ دیبالا گۆڵێکی بۆ یانەی رۆما تۆمارکرد، یانە ئیتاڵییەکە پێشکەوت و نیوەی یەکەم لە بەرژەوەندی ئەوان کۆتاییهات.
لە خولەکی 55 جیانلوکا مانچینی بەهەڵە گۆڵێکی لە خۆیان کردەوە و ئەنجامەکەی بۆ سێڤییا یەکسانکردەوە.
یارییەکە لەنێو بەرگرییەکی زۆری رۆما و ترسی سێڤییادا لە کاتی ئاساییدا بەیەکسانبوون کۆتاییهات و هەردوولا پەنایان بردە بەر 30 خولەکی کاتی زیادکراو.
لە کاتی زیادکراودا هیچ گۆڵێکی دیکە نەکرا و لێدانەکانی یەکلاکەرەوە بووە خاڵی یەکلاکردنەوەی نازناوی پاڵەوانێتییەکە.
سێڤییا لەلێدانەکانی یەکلاکەرەوەدا باشتر بوو و بە 4-1 یارییەکەی لە بەرژەوەندی خۆی یەکلاکردەوە و نازناوەکەی بردەوە.
ئەمە جاری حەوتەمە یانە ئیسپانییەکە نازناوی یۆرۆپالیگ بباتەوە، 7 جار گەیشتووەتە یاریی کۆتایی و هەموو یارییەکانی کۆتایی بردووەتەوە.
بەبردنەوەی نازناوەکەش یانەکە راستەوخۆ گەیشتە چامپیۆنزلیگی وەرزی داهاتوو، بەمەش وەرزی داهاتوو 5 یانەی ئیسپانی بەشداری لە چامپیۆنزلیگدا دەکەن.
جۆزێ مۆرینیۆ یەکەمجارە لە یاریی کۆتاییدا لەسەر ئاستی ئەوروپا بدۆڕێت و نەیتوانی یۆرۆپالیگ بۆ یانەکە بباتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ