رووداو دیجیتاڵ
دوای گەڕانەوەی هەڵبژاردەی خانمانی ئێران بۆ وڵاتەکەیان، راپۆرتە رۆژنامەڤانییەکان ناوی ئەو یاریزانە ئاشکرا دەکەن کە لە دوایین ساتەکاندا پەشیمانبووەوە و لەگەڵ هەڵبژاردەکە گەڕایەوە.
پێنج یاریزانی هەڵبژاردەی خانمانی ئێران، داوای مافی مانەوەیان لە ئوسترالیا کرد و هەر پێنجیان بەفەرمی مافەکەیان لەلایەن حکومەتی ئوسترالیاوە پێدرا، دوای ئەوە دوو ئەندامی دیکەی شاندەکە داوای مافەکەیان کرد و وەزیری ناوخۆی ئوسترالیا رایگەیاند، ئەو دوو کەسەش مافی مانەوەیان پێدراوە، بەڵام یەکێکیان لە دوایین ساتەکاندا پەشیمانبووەتەوە.
سەرەتا کاتێک هەواڵەکە بڵاوبووەوە، ناوی ئەو کەسە ئاشکرا نەکرابوو کە پەشیمانبووەتەوە و بڕیاریداوە لەگەڵ هەڵبژاردەکە بگەڕێتەوە بۆ ئێران.
بەپێی راپۆرتە رۆژنامەڤانییەکان، موحەدسە زۆڵفی، ئەو یاریزانە ئێرانییەیە کە لە دوایین ساتەکاندا بڕیاریداوە پەشیمان ببێتەوە و لەگەڵ شاندی هەڵبژاردەی ئێران گەڕاوەتەوە وڵاتەکەی.
ئەمە لەکاتێکدایە ئەو یاریزانەش داوای مافی مانەوەی لە ئوسترالیا کردبوو، بەڵام پەشیمانبووەوە و گەڕایەوە ئێران.
چەند سەرچاوەیەکی رۆژنامەڤانی ئاماژە بۆ ئەوە دەکەن، هەڕەشە لە خێزانی یاریزانەکان کراوە و پێیانگوتراوە خێزانەکانتان نیگەرانن بۆیە بگەڕێنەوە.
هەڵبژاردەی تۆپی پێی خانمانی ئێران لە جامی ئاسیا لە ئوسترالیا، سێ یارییان ئەنجامدا و هەرسێ یارییەکەیان دۆڕاند، ئەوان لە یاریی یەکەمیاندا بەرامبەر کۆریای باشوور ئامادەنەبوون سروودی نیشتمانی وڵاتەکەیان بڵێنەوە، ئەوەش کاردانەوەی زۆر گەورەی بەدوای خۆیدا هێنا و یاریزانانی هەڵبژاردەکە رووبەڕووی هەڕەشەی جیاواز بوونەوە، بۆیەش 6 ئەندامی شاندی هەڵبژاردەکە مافی مانەوەیان لە ئوسترالیا پێدرا و لەگەڵ هەڵبژاردەکە نەگەڕانەوە ئێران.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ