رووداو دیجیتاڵ
یاریی لووتکەی خولی فەرەنسا بەڕێوەدەچێت و یانەی پاریس سانجێرمان بەبردنەوە و یەکسانبوون لە یارییەکەدا نازناوی خولەکە دەباتەوە.
لە گەڕی 33 و پێشکۆتایی ئەم وەرزەی خولی فەرەنسا، کاژێر 22:00 یانەی پاریس سانجێرمانی پێشەنگی ریزبەندی خولەکە لە دەرەوەی یاریگای خۆی بەرامبەر یانەی لانسی دووەمی ریزبەند یاریی دەکات، ئەمە گرنگترین و بەهێزترین یاریی ئەم وەرزەی خولەکەیە، بەتایبەت کە جیاوازیی هەردوو یانە شەش خاڵە.
پاریس سانجێرمان لە یارییەکەی ئەمشەودا بەبردنەوە و یەکسانبوون دەتوانێت نازناوی وەرزەکە لە بەرژەوەندی خۆی یەکلابکاتەوە، لانس دەیەوێت لە رکابەریکردن بەردەوامبێت و پاڵەوانبوونی یانەکە دوابخات.
ئەم یارییە لەکاتێکدایە، پاریس سانجێرمان لە یاریی کۆتایی چامپیۆنزلیگە و پێش ئەو یارییە چاوی لە یەکلاکردنەوەی خولی ناوخۆیەوە.
یارییەکە یەکەم یاریی عوسمان دێمبێلێ دەبێت، دوای ئەوەی وەکو باشترین یاریزانی فەرەنسی بۆ ئەمساڵ دەستنیشانکرا و ئەمشەو دەیەوێت هاوکاریی تیپەکەی بکات بۆ بەدەستهێنانی نازناوەکە.
پاریس سانجێرمان بەبردنەوەی نازناوی خولی فەرەنسا دەبێتە خاوەنی 14 نازناوی خولەکە و بۆ وەرزی پێنجەم لەسەریەک نازناوەکە دەباتەوە.
یانەی لانس، لەم وەرزەدا بە ئاستێکی بەرزەوە دەرکەوتووە، یانەکە سەرکەوتنی بۆ چامپیۆنزلیگ مسۆگەرکردووە و دەیەوێت سوود لە یاریگا و هاندەرانی وەربگرێت بۆ ئەوەی لە پاریس سانجێرمان بباتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ