رووداو - هەولێر
یەکێتی تۆپی پێی کوردستان، بۆ بڕیاردان لەبارەی یارییەکانی دوایین گەڕی خولی تازەپێگەیشتووانی کوردستان لە کۆبوونەوەدایە.
یەکێتییەکە بە ئامادەبوونی نوێنەرانی هەریەکە لە یانەکانی پێشمەرگەی سلێمانی، جیهان، زاخۆ و ئاشتی لە کۆبوونەوەدایە، بۆ گفتوگۆکردن لەبارەی ئەو رووداوانەی لە دوایین یارییەکانی گەڕی کۆتایی خولەکەدا روویاندا.
محەممەد کارێزی، پەیامنێری رووداو لە شوێنی کۆبوونەوەکە رایگەیاند، یەکێتی تۆپی پێی کوردستان ناوبژیوان و سەرپەرشتیارانی هەردوو یارییەکەشی بۆ کۆبوونەوەکە بانگهێشتکردووە، بۆ ئەوەی راستی رووداوەکان بزانن و لێکۆڵینەوەی ورد لەبارەی ئەو دوو یارییە دەکرێت.
لە گەڕی کۆتایی خولەکەدا، یانەی پێشمەرگەی سلێمانی بە 17 گۆڵ بەرامبەر گۆڵێک لە یانەی جیهانی بردەوە، زاخۆش بە 6-2 سەرکەوتنی بەسەر یانەی ئاشتی بەدەستهێنا، بەمەش یانەی زاخۆ نازناوەکەی لە بەرژەوەندی یانەی پێشمەرگەی سلێمانی بەجیاوازیی گۆڵ لە دەستدا.
ئەنجامی یارییەکەی پێشمەرگەی سلێمانی و جیهان، کاردانەوەی زۆری لەنێو وەرزشوانانی کوردستان و تۆڕە کۆمەڵایەتییەکان دروستکرد، حەمید سەلمان، سەرۆکی یانەی زاخۆش بە رووداوی گوت، ئەوەی لەو یارییەدا روویدا مێژووێکی رەشە و کاریگەرییەکی زۆر خراپی لەسەر وەرزشی کوردستان دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ