رووداو دیجیتاڵ
یانەی ریال مەدرید دەیەوێت بردنەوەیەکی دیکە تۆماربکات و بگەڕێتەوە پێشەنگی ریزبەندی خولی ئیسپانیا، کاتێک لە دەرەوەی یاریگەی خۆی رووبەڕووی خێتافی دەبێتەوە.
لە رکابەرییەکانی گەڕی نۆیەمی خولەکەدا، ئەمشەو کاژێر 22:00 ریال مەدرید لە دەرەوەی یاریگەی خۆی بەرامبەر خێتافی یاری دەکات و پێویستی بەبردنەوەیە بۆ ئەوەی جارێکی دیکە پلەی یەکەمی ریزبەندی خولەکە لە یانەی بارسێلۆنا وەربگرێت.
کیلیان ئێمباپێ رۆژی یەکشەممە بەشێوەیەکی ئاسایی بەشداریی لە مەشقەکانی یانەکەدا کردووە و بەتەواوی بۆ یارییەکەی ئەمشەو ئامادەیە و دەیەوێت سەرکردایەتیی یانەکە بکات بۆ بەدەستهێنانی سێ خاڵی دیکە، بۆ ئەوەی پێشەنگی ریزبەند لەدەست نەدەن و بە ورەیەکی بەرزەوە بۆ یاریی داهاتوویان بەرامبەر بارسێلۆنا ئامادەبن.
لە یارییەکەی ئەمشەودا دین هاوسن، دانی کارڤاخاڵ، دانی سێبایۆس و ئەنتۆنیۆ رۆدیگێر بەهۆی پێکانەوە بەشداری لە یارییەکەدا ناکەن.
لە دوایین 7 یاریی نێوان هەردوو یانەدا، ریال مەدرید سەرجەم یارییەکانی بردووەتەوە و تەنیا یەک گۆڵی لێکراوە، لە وەرزی 2021-2022ـەوە بەرامبەر ئەو یانەیە نەدۆڕاوە و ئەمشەویش دەیەوێت پارێزگاری لەو دۆخە باشەی بکات کە بەرامبەر میواندارەکەی هەیەتی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ