رووداو دیجیتاڵ
مارکۆ روبیۆ، وەزیری دەرەوەی ئەمریکا رایگەیاند، وڵاتەکەی سزاکانی سناپباک بەسەر "رژێمی" ئێراندا جێبەجێ دەکات و رایگەیاند، سزای نوێ 44 لایەنی پەیوەست بە پرۆگرامە ئەتۆمی، مووشەکی و سەربازییەکانی ئێران دەکاتە ئامانج.
رۆژی چوارشەممە، 01-10-2025، وەزارەتی دەرەوەی ئەمریکا وردەکاریی بەشێک لە سزاکانی خستەڕوو و رایگەیاند، پێنج کەس و دامەزراوەیەک دەکاتە ئامانج کە پەیوەستن بە رێکخراوی داهێنان و توێژینەوەی بەرگریی ئێرانەوە (SPND)، کە بە درێژکراوەی راستەوخۆی پرۆگرامی چەکی ئەتۆمیی پێش ساڵی 2004ـی ئێران دادەنرێت.
ئەم هەنگاوە دوای بڕیارەکەی 27ـی ئەیلوولی نەتەوە یەکگرتووەکان دێت بۆ سەپاندنەوەی سزا و سنووردارکردنەکان لەسەر پرۆگرامە ئەتۆمی و مووشەکییەکانی تاران، کە بەهۆی "پابەندنەبوونی بەرچاوی" ئێرانەوە بوو بە بەڵێنە ئەتۆمییەکانی.
روبیۆ لە پۆستێکدا لە تۆڕی کۆمەڵایەتیی ئێکس نووسیویەتی: "وەک چۆن سەرۆک روونیکردووەتەوە، ئێمە رێگری لە ئێران دەکەین لە گەیشتن بە هەر رێگایەک بۆ چەکی ئەتۆمی."
ئەو کەس و لایەنانەی سزاکان دەیانگرێتەوە
سزاکانی وەزارەتی دەرەوە بەشێکن لەو پاکێجە گەورەیەی کە 44 لایەن دەکاتە ئامانج. دیارترینی ئەو کەس و دامەزراوانەی ناویان هاتووە:
رەزا موزەففەرینیا: بەڕێوەبەری ئێستای رێکخراوی SPND. سەرپەرشتیی هەوڵەکانی رێکخراوەکەی کردووە بۆ پەرەپێدانی تەکنەلۆژیای هەستیار کە ئەگەری بەکارهێنانیان لە چەکی ئەتۆمیدا هەیە.
عەلی فولادڤەند: سەرۆکی بەڕێوەبەرایەتیی توێژینەوە لە رێکخراوی SPND. کارئاسانی بۆ هەوڵەکانی رێکخراوەکە کردووە بۆ بەدەستهێنانی تەکنەلۆژیای هەستیاری دوو-بەکارهاتوو.
محەممەد رەزا قەدیر زارە زغالچی: بەرپرسێکی دێرینی سەر بە SPND و سەرۆکی گرووپی شەهید فەخری موقەدەم، کە گرووپێکی لاوەکیی SPNDـە.
کۆمپانیای تەکنەلۆژیای نێودەوڵەتیی ئەندیشێ دەماوەند (DamavandTec): کۆمپانیایەکی ئێرانییە کە وەک رووپۆشێک بۆ SPND کاری کردووە و کارئاسانیی بۆ گەشتی پسپۆڕانی ئەتۆمیی ئێرانی کردووە بۆ رووسیا.
عەلی کەلوەند: بەڕێوەبەری جێبەجێکاری کۆمپانیای DamavandTec کە هەوڵیداوە کەرەستەی تایبەت بە پەرەپێدانی ئامێرە تەقینەوە ئەتۆمییەکان بکڕێت.
عەلی بەکویی: سەرۆکی دەستەی کارگێڕیی کۆمپانیای DamavandTec و سەر بە SPND، کە هەمان هەوڵی داوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ