هەڵدانی یاریی ئاگرین لە رۆژی سەربەخۆیی ئەمریکا
رووداو دیجیتاڵ
لە رۆژی سەربەخۆیی ئەمریکادا ترس لە چاوی سەگەکان دەبارێت. لەو رۆژەدا لە ترسی ئاهەنگ و یارییە ئاگرینەکان، زۆرترین ئاژەڵی ماڵی وندەبن، بەتایبەتی سەگە ماڵییەکان، بەو پێیەی ئاستی هەستیارییان ئێجگار بەرزە.
لەو رۆژەدا ئەمریکییەکان گەورەترین خەمیان سەگەکانیانە، سەردانی ڤێتێرنێرییەکان دەکەن و هەموو رێگەیەک بۆ هێورکردنەوەیان دەگرنەبەر.
تۆری فوگەیت، ڤێتێرنەر دەڵێت، "هێشتنەوەی سەگەکانتان لە ماڵەکان رێگەیەکی زۆر باشە بۆ دامرکاندنەوەیان و دوورخستنەوەیان لەو ژاوە ژاوە. دەنگی تەلەڤیزیۆن و رادیۆکە بەرزبکەیتەوە بۆئەوەی سەگەکان گوێیان لەم تەق و تریقە نەبێت. شتانێک هەن دەتوانیت بیکڕیت بۆئەوەی ترسیان نەمێنێت، وەکو فانیلەی هەورەتریشقە، حەبی هێورکردنەوە یاخود چارەسەری هێورکردنەوە."
ساڵانە لە 4ی تەممووز بەهۆی یاریی ئاگرین رووداوی زۆر روودەدەن. ئەمساڵ حاکم و سەرۆکشارەوانییەکان رێوشوێنی تووندتر دەگرنەبەر، لە نیویۆرک لە هەموو کوچە و کۆڵانێک پۆلیس و هێزی دژەتیرۆر دەبیندرێن.
ئێدوارد جابان، پۆلیسی ئێشکگری بە وەکالەت دەڵێت، "ئێستا هیچ هەڕەشەیەکی دیار بەهۆی یاریی ئاگرینەوە لەسەر رۆژی 4ی تەممووز یاخود هیچ بۆنە و ئاهەنگێک نییە کە لە نیویۆرک بەڕێوەدەچن، بەڵام بێگومان پێشبینیی تووندوتۆڵکردنی رێوشوێنی ئەمنی بکەن لەگەڵ داخستنی شەقام و ترافیکەکان."
لە 2022دا 11 کەس بەهۆی یارییە ئاگرینەکانەوە لە رۆژی سەربەخۆیی ئەمریکادا گیانیان لەدەستدا، 10200 کەس بریندار بوون، ساڵی پێشتریش 15600 کەس. لە 2022دا رێژەی ونبوونی ئاژەڵی ماڵیش 81% زیادیکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ