رووداو دیجیتاڵ
سەرۆکی ئەمریکا داوا دەکات "رێککەوتنی ئاشتیی ئەتۆم" لەگەڵ ئێران واژۆ بکرێت، دەشڵێت "دەمەوێت ئێران سەرکەوتوو بێت، بەڵام چەکی ئەتۆمی نەبێت."
رۆژی چوارشەممە (05-02-2025) دۆناڵد ترەمپ، سەرۆکی ئەمریکا لە تۆڕی کۆمەڵایەتیی ترووس سۆشیاڵ بڵاویکردەوە "من، دەمەوێت ئێران ببێتە وڵاتێکی مەزن و سەرکەوتوو، بەڵام وڵاتێک کە نەتووانێت چەکی ئەتۆمی هەبێت. پێم باشە رێککەوتنێکی پشتڕاستکراوەی ئاشتیی ئەتۆم بکرێت، کە رێگە بە ئێران بدات گەشە بکات و خۆشگوزەران بێت."
ترەمپ ئەو دەنگۆیانەی رەتکردەوە، گوایە ئەمریکا و ئیسرائیل پێکەوە کاردەکەن بۆ ئەوەی ئێران ورد و خاش بکەن، گوتیشی "ئەمە، زێدەڕۆیی زۆری تێدا کراوە."
سەرۆکی ئەمریکا لەبارەی رێککەوتنەکە گوتی، "پێویستە دەستبەجێ کاری لەسەر بکەین، دواتر ئاهەنگێکی گەورە لە رۆژهەڵاتی نێوەڕاست بگێڕین، کاتێک رێککەوتنەکە واژۆدەکرێت و تەواودەکرێت."
لە کۆتایی پۆستەکەی دا، سەرۆکی ئەمریکا نووسیویەتی "خوا رۆژهەڵاتی نێوەڕاست بپارێزێت."
لەماوەی خولی یەکەمی کە لە 2021 تەواو بوو، ترەمپ ئەمریکای لە رێککەوتنی ئەتۆمی ئێران کشاندەوە و چەندین سزای قورسی بەسەردا سەپاند.
عەباس عێراقچی، وەزیری دەرەوەی ئێران لەبارەی "سیاسەتی ئەوپەڕی گوشار لەسەر ئێران" گوتی، "ئەمە تاقیکردنەوەیەکی شکستخواردووە و ئەگەر دووبارەی بکەنەوە، دەبێتە شکستێکی دیکە. ئەگەر تەنیا پرسەکە ئەوەیە ئێران چەکی ئەتۆمی نەبێت، ئەوە شتێکە ئاسانە و نابێتە کێشەیەکی گەورە."
محەممەد ئیسلامی، سەرۆکی دامەزراوەی وزەی ئەتۆمیی ئێران رایگەیاند، "ئێران هیچ پرۆگرامێکی چەکی ئەتۆمی نییە و ناشیبێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ