رووداو دیجیتاڵ
دۆناڵد ترەمپ، سەرۆکی ئەمریکا رۆژی پێنجشەممە رایگەیاند، ئەو بەربژێرێکی نموونەیی نییە بۆ چوونە بەهەشت، بەڵام بە ئەگەرێکی زۆرەوە دەچێتە ناوی.
لە گوتارێکیدا لە رێوڕەسمی "نانی بەیانیی نزا نیشتمانییەکان"، ترەمپ باسی لە چانسەکانی خۆی بۆ چوونە نێو بەهەشت کرد و گوتی: "بە راستی بڕوام وایە دەچمە ناوی. مەبەستم ئەوەیە، من بەربژێرێکی نموونەیی نیم، بەڵام کاری زۆر باشم بۆ خەڵکی نموونەیی کردووە."
سەرۆکی ئەمریکا ئاماژەی بە لێدوانەکانی رابردووی کرد کە ببووە هۆی هەرا و رەخنەی میدیایی و گوتی، ئەو قسانەی پێشتر کە گوتبووی "لە رێگەی بەهەشتدا نییە"، تەنیا بۆ گاڵتە و گەپ بووە.
ترەمپ روونیکردەوە کە زۆرجار بە شێوەی توانج لەگەڵ میدیا دەدوێت و گوتی: "ئەوان وشەکانی تۆ دەنووسنەوە"، هاوکات گاڵتەی بەو بڵاوکراوە میدیاییانە کرد کە دوای لێدوانەکانی رابردووی بڵاوکرانەوە و دووپاتی کردەوە کە "تەنیا گاڵتەی کردووە."
ئەم قسانەی سەرۆکی ئەمریکا دوای ئەوە دێن، کە مانگی تشرینی یەکەمی ساڵی رابردوو لە کاتی گەشتکردنی بۆ ئیسرائیل، لەناو فڕۆکە بە رۆژنامەنووسانی گوتبوو: "بڕوا ناکەم هیچ شتێک هەبێت من بباتە بەهەشتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ