رووداو دیجیتاڵ
شەڕەتەقە لە سەربازگەیەکی نەمسا روویدا، بەهۆیەوە سەربازێک کوژرا و یەکێکی دیکەش برینداربوو.
رۆژی هەینی 6ـی کانوونی دووەمی 2023، مایکڵ بۆوەر، گوتەبێژی سوپای نەمسا لە تویتێکدا نووسی: "کاژێر 07:00ـی بەیانیی ئەمڕۆ بە کاتی ڤیێنا [کاژێر 09:00ـی بەکاتی هەولێر] لە سەربازگەیەکی شارۆچکەی وینەر نووشتاد" لە باشووری ڤیێنای پایتەختی وڵاتەکە دوو سەرباز بووەتە شەڕیان و "سەربازێک کوژراوە و ئەوی دیکەیان بریندارە."
لای خۆشیەوە، میدیای فەرمیی وڵاتەکە لەسەر زاری گوتەبێژی سوپاوە رایگەیاند، پێش ئەوەی تەقە بکرێت، هەردوو پیاوەکە دەمەقاڵێیان کردووە: "دواتر یەکێک تەقەی بە ئاسماندا کردووە پێش ئەوەی بکوژرێت." میدیای وڵاتەکە گوتیشی، سەربازە تەمەن 20 ساڵەکە لەلایەن ئەفسەرێکی لەخۆی پلە باڵاترەوە تەقەی لێکراوە و کوژراوە.
رووداوی لەوجۆرە لە نەمسا دەگمەنن؛ لە ساڵی 2019دا سەربازێکی نەمسایی کە تەمەنی 31 ساڵ بوو، لە هەمان ئەو سەربازگەیە گیانی لەدەستدا، ئەوەش دوای ئەوەی لەلایەن دوو سەگی سوپاوە پەلاماردرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ