وەزیری دەرەوەی بەلجیکا بۆ رووداو: گرنگە مافی کەمینەکان پارێزراو بێت

 

 

رۆژی سێشەممە 06-01-2026 ماکسیم پریڤۆ، جێگری سەرۆکوەزیران و وەزیری دەرەوەی بەلجیکا قسەی بۆ دیار کوردە، بەڕێوەبەری نووسینگەی تۆڕی میدیایی رووداو لە واشنتن کرد.

 

پریڤۆ گوتی، "پێمان وایە پێویستە دەرفەت بە حکومەتی ئێستا بدرێت، چونکە سەردەمی ئەسەد بەڕاستی کارەساتبار بوو. یەکێک لە لایەنە سەرەکییەکان بریتییە لەو گرنگییەی کە پێویستە حکومەتی نوێ بە هەموو کەمینەکان بە رێبازێکی گشتگیر بیدات."

 

 

وەزیری دەرەوەی بەلجیکا هەواڵێکی تایبەتی بۆ رووداو درکاند و گوتی، "چەند هەفتەیەک لەمەوبەر بڕیارم دا، بۆ یەکەمجار، باڵیۆزێکی نوێ رەوانەی سووریا بکەم بۆ ئەوەی دڵنیابین لەوەی لە هەموو پرۆسەکەدا (بنیاتنانەوە و سیاسی) یاوەرییان دەکەین."

 

 

سەبارەت بە هەڵوێستی وڵاتەکەی لەبارەی تێکەڵکردنی هێزەکانی سووریای دیموکرات (هەسەدە) و پێکهاتەی نوێی بەرگریی سووریا، پریڤۆ بە رووداوی گوت، "بەلجیکا پشتیوانی لە هەموو جۆرە یەکگرتنەوەیەک دەکات کە ببێتە هۆی ئاشتی لە ناوچەکە و رێگری لە زیادبوونی گرژییەکان."

 

وەزیرەکە مەرجی سەرەکیی بۆ ئەم تێکەڵبوونە دیاری کرد کە بریتییە لە "رێزگرتن لە خەڵک و یاسای نێودەوڵەتی، هەروەها دڵنیابوون لەوەی ئەو پرۆسەیە بەڕاستی ئاگای لە هەموو کەمینەکان دەبێت."

 

 

وەزیری دەرەوەی بەلجیکا: با راستگۆ بم لەگەڵتان، ئێمە پێمان وایە بەدڵنیاییەوە، پێویستە دەرفەتێک بە حکومەتی ئێستا بدەین، چونکە سەردەمی ئەسەد بەڕاستی کارەساتبار بوو. بێگومان ئێستا هەموو شتێک چارەسەر نەبووە. یەکێک لە لایەنە سەرەکییەکان بەدڵنیاییەوە ئەو بایەخەیە کە پێویستە حکومەتی نوێ بە هەموو کەمینەکان بیدات، هەموویان بەبێ جیاوازی و بەشێوەیەکی گشتگیر. هەروەها چەند هەفتەیەک لەمەوبەر، بڕیارم دا بۆ یەکەمجار باڵیۆزێکی نوێ رەوانەی سووریا بکەم بۆ ئەوەی دڵنیابین لەوەی لە هەموو پرۆسەکەدا یاوەرییان دەکەین. هیوادارم بتوانرێ رێگری لە هەر جۆرە کێشەیەک لە پرۆسەی بنیاتنانەوەی وڵاتەکەدا بکرێ. بەڵام دەبێت بەتەواوی سەرنج بخەینە سەر ئەم پرۆسە گشتگیرە.

 

 

وەزیری دەرەوەی بەلجیکا: بە راشکاوی، من وردەکاریی تەواوم لەسەر ئەو لایەنانە نییە، بۆیە خۆم دەپارێزم لەوەی شتێکی هەڵە بڵێم. بەڵام راستییەکەی ئەوەیە بەلجیکا پشتیوانی لە هەموو جۆرە یەکگرتنەوەیەک دەکات کە ببێتەهۆی بەرقەراربوونی جۆرێک لە ئاشتی لە ناوچەکە، بۆ ئەوەی دڵنیابین لەوەی رێگری لە هەر جۆرە هەڵکشانێک دەکەین. گرنگە رێز لە خەڵک و رێز لە یاسای نێودەوڵەتی بگیرێت، هەروەها دڵنیایی هەبێت کە ئەو پرۆسە گشتگیرەی دەستپێکراوە، بەڕاستی ئاگای لە هەموو کەمینەکان دەبێت. زۆر سوپاس.