رووداو دیجیتاڵ
جەی دی ڤانس، جێگری سەرۆکی ئەمریکا لە سەردانەکەیدا بۆ ئەرمینیا رایگەیاند، پرسی مافەکانی مرۆڤ و "سەرکوتکردنی تووندی خۆپێشاندەران" لەلایەن تارانەوە، بەشێکی دانەبڕاو و سەرەکیی دانوستاندنەکانی نێوان واشنتن و ئێرانە. ڤانس جەختی کردەوە، دۆناڵد ترەمپ لەم بارەیەوە داواکاریی "زۆر تووندی" هەیە.
جێگری سەرۆکی ئەمریکا لە لێدوانێکدا لە یەریڤان ئاماژەی بەوە کرد، دۆناڵد ترەمپ هێڵە سوورەکانی دانوستاندن دیاری دەکات، بەڵام حەز دەکات کارتەکانی بە "نهێنی" بهێڵێتەوە. ڤانس گوتی: "سەرۆک ئەوەی لە ناو دانوستانەکاندا دەیکات بە ئاشکرا رایناگەیەنێت، چونکە دەیەوێت مەودای بڕیاردان بۆ خۆی بپارێزێت و رێگە نەدات گوشاری دەرەکی سنوورداری بکات."
ڤانس ئاماژەی بەوەش کرد، ئەمریکا لە رابردوودا هەوڵی زۆری داوە بۆ گەیشتن بە رێککەوتنێکی بنیاتنەر کە لە بەرژەوەندیی هەردوولادا بێت، بەڵام بە گوتەی ئەو "ئێرانییەکان ئەوەندە ژیر نەبوون ئەو دەرفەتە بقۆزنەوە."
سەبارەت بە دۆخی ناوخۆیی ئێران و مامەڵەی دەسەڵاتداران لەگەڵ ناڕەزایەتییەکان، جەی دی ڤانس رایگەیاند، "سەرکوتکارییەکان دڕندانە و تووندوتیژ بوون". ڤانس گوتی: "ئێمە لەگەڵ گەلی ئێران و مافی خۆپێشاندانی ئاشتییانە دەوەستین. پرسی لەسێدارەدانی زیندانییان و پێشێلکارییەکان نەک تەنیا لەگەڵ ئێرانییەکان، بەڵکو لەگەڵ هەموو وڵاتانی ناوچەکەدا وەک تەوەرێکی سەرەکی باس کراوە."
![ئیمانوێل ماکرۆن، سەرۆککۆماری فەرەنسا [لای راست] و مەسعود پزیشکیان، سەرۆککۆماری ئێران.](https://www.rudaw.net/s3/rudaw.net/ContentFiles/942713Image1.jpg?mode=crop&quality=70&rand=1&scale=both&w=362&h=226&version=8590226 "ئیمانوێل ماکرۆن، سەرۆککۆماری فەرەنسا [لای راست] و مەسعود پزیشکیان، سەرۆککۆماری ئێران.")
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ