رووداو دیجیتاڵ
بەهۆی تەقینەوەیەکەوە لە کارگەیەکی دروستکردنی مادەی تەقەمەنی لەنزیک ناشڤیڵ لە ویلایەتی تێنیسیی ئەمریکا، چەندین کەس گیانیان لەدەستدا و بێسەروشوێنن.
دەزگا ئەمنییەکانی ویلایەتی تێنسی پشتڕاستیان کردەوە، تەقینەوەکە "گەورە" بووە و لە کۆمپانیای ئەکیورت ئینێرجێتیک سیستمز لە شاری هیکمان لە ویلایەتی تێنسی روویداوە.
بەگوێرەی پۆلیسی شارەکە، "چەندین" کەس گیانیان لەدەستداوە.
بەرپرسێک لە بەڕێوەبەرایەتیی فریاکەوتنی ناوچەی هەمفری رایگەیاند، لانیکەم 19 کەس بێسەروشوێنن و چەندینی دیکەش لە نەخۆشخانە چارەسەر وەردەگرن.
تیمە فریاگوزارییەکان لە شوێنی تەقینەوەکەن و سەرقاڵی کۆنترۆڵکردنی دۆخەکەن.
دامودەزگەکان داوایان لە خەڵک کردووە لە ناوچەکە دووربکەونەوە بۆ ئەوەی رێگە بدەن تیمەکانی فریاکەوتن کارەکانیان بکەن؛ هەروەها داوا لە ئەندامانی خێزانی کوژراوان و بێسەروشوێنبووان کراوە بۆ وەرگرتنی زانیاریی زیاتر، سەردانیان بکەن.
بەگوێرەی ماڵپەڕی فەرمیی کۆمپانیاکە، ئەکیورت ئینێرجێتیک سیستمز لە ساڵی 1980 دامەزراوە و "تایبەتە بە پەرەپێدان، بەرهەمهێنان، مامەڵەکردن و کۆگاکردنی بەرهەمە تەقەمەنییەکان کە لە هەردوو کەرتی بەرگری و بازرگانی بەکاردەهێنرێن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ