چەند وشترێک لە کینیا.
رووداو دیجیتاڵ
عەبدوڵڵاهی، ئاژەڵدارێکە لە سنووری شاری لایکیپیا لە نێوەڕاستی کینیا و پار 30 سەر مانگای هەبوو. بەهۆی کاریگەرییەکانی وشکەساڵییەوە هەموویان لەنێوچوون.
پیاوە ریش سپییە تەمەن 65 ساڵەکە، کە باوکی 15 منداڵە، زانی خەفەتخواردن دادی نادا، بێ بیرکردنەوە رۆیشت و 20 سەر وشتری کڕی.
ئەم ساڵ پاڵی لێ داوەتەوە، وشترەکانی ئاوێکی کەمیان دەوێ و هەموو جۆرە رووەکێکی خۆڕسکیش دەخۆن.
عەبدوڵاهی محەممەد، جوتیارە و دەڵێت: "بەهۆی نەبوونی سەوزایی راگرتنی مەڕوماڵات سەختە. بەڵام بەخێوکردنی وشتر ئاسانە بەو پێیەی لەسەر رووەکی خۆڕسک دەژیت و دەتوانێت بەرگەی دۆخی سەختیش بگرێت."
لە کینیا هەر مانگایەک بایی 150 دۆلارە و وشتریش نرخی تا 600 دۆلار دەڕوات.
موسالیا پیتی، هاووڵاتییەکی هۆزی سامبورویە و دەڵێت: "وشکەساڵی سەریهەڵدا 50 سەر مانگامان هەبوو. سەرجەمیانمان فرۆشت و پێنج وشترمان کڕی. ئەوان بەرگەی وشکەساڵی زیاتر دەگرن. هەر کە باران باری، دوو بۆ سێ وشتر دەفرۆشێن و مانگا بۆ شیر دەکڕین."
هۆزی سامبورو لە نێوەڕاستی کینیا جاران مارەبڕییان لەسەر چەند سەر مانگایەک بوو. لەوانەیە کەمبوونەوەی مەڕوماڵات وابکات پێداچوونەوە بە گرێبەستی هاوژینییدا بکەن.
لێسیان سامپیر، هاووڵای کینیاییە و باس لەوە دەکات: "لەوانەیە ئێستا پاساوت هەبێ ئەگەر مەڕوماڵات وەکو مارەیی نەبەخشی، بەڵام باشتر وایە مانگایەک بە دیاری بدەیتە دایک و باوکی کچە. ئەمە وادەکات کچی خۆیان بدەن بە تۆ."
بەڕێوەبەرایەتی ئیدارەدانی قەیرانی نیشتیمانیی کینیا دەڵێت، لە 2022 نزیکەی 2.6 ملیۆن مەڕوماڵات بەهۆی وشکەساڵییەوە لەنێوچوون، زیانەکە بە 1 ملیار و 753 ملیۆن دۆلار مەزەندە دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ