لە سەقزەوە بۆ ئەڵمانیا؛ ژنێکی کورد لە پارتی لیبراڵەکان بەربژێرە بۆ هەڵبژاردنی هەرێمەکان

 

 

نیوشا عەرابی لەدایکبووی شاری سەقزە و تاوەکو تەمەنی 10 ساڵی لەگەڵ خێزانەکەی لە سنە ژیاوە، دوای کۆچکردنی بۆ ئەڵمانیا، بووەتە ئەندامی پارتی دیموکراتی ئازاد (FDP) یان پارتی لیبراڵی ئەڵمانیا. لە هەڵبژاردنە خۆجێییەکانی هەرێمی نۆردراین ڤێستفاڵن، ئەو بەربژێرە بۆ دوو ئەنجوومەن.

 

نیوشا عەرابی، بەربژێری پارتی دیموکراتی ئازاد - لیبراڵی ئەڵمانیا دەڵێت، "لەم هەڵبژاردنەدا خۆم بۆ دوو شت بەربژێر کردووە، یەکێکیان ئەنجوومەنی شارەوانییە کە ئامانجەکانی پەرەدانە بە کولتوور و باشترکردنی ناوچەی شارەکە، بۆ نموونە دروستکردنی قوتابخانە یان هەندێک شتی دیکە کە بتوانێت ژیانی خەڵک ئاسانتر بکات، دووەمیش ئەنجوومەنێکە کە ئەمجارە بۆ پەنابەرانە، رەنگە ئەمە لە زۆربەی وڵاتانی دیکەی ئەورووپادا وەکو ئەڵمانیا نەبێت، بەڵام لە ئەڵمانیا ئەم دەرفەتە بە پەنابەران دراوە کە شوێنێکیان هەبێت و بتوانن لەوێ داواکارییەکانی خۆیان باس بکەن، بۆ نموونە بۆ کۆرسی زمان، یان بۆ ئەوەی چۆن بتوانن باشتر لەگەڵ ئەم کۆمەڵگەیە تێکەڵ ببن و چۆن بتوانن باشتر خۆیان بدۆزنەوە و ژیانێکی باش بۆ خۆیان دروست بکەن."

 

لەسەر پۆستەرە تایبەتەکانی بەربژێربوونی بۆ ئەنجوومەنی بیانییەکان، بە کوردی نووسراوە و ئەزموونی بیانیبوونی خۆی بە هەموو وردەکارییەکانییەوە خراوەتەڕوو.

 

عەرابی باس لەوە دەکات، "کەسێک بووم هەوڵم دا لەم وڵاتەدا خۆم بدۆزمەوە، کاتێک مرۆڤ دێتە ئێرە هەست بە نامۆییەکی زۆر دەکات، تەنانەت دارەکان و تەلارسازیی شارەکەیشی بەلاوە ئاشنا نییە، لە هەمان کاتدا، پێویستە هەندێک گۆڕانکاریی جیددی لە سیاسەتی تایبەت بە کۆچبەران بکرێت، بۆیە خۆم ئەزموونی ئەم شتانەم کردووە و دەتوانم بڵێم، هەوڵێکی زۆرم داوە تاوەکو توانیم لێرە خۆم بدۆزمەوە."

 

کەم کورد هەن پارتە لیبراڵەکان لە ئەورووپا بۆ سیاسەتکردن هەڵبژێرن، هەرچەندە هەندێک نموونە لە وڵاتانی ئەسکەندەنافیا هەن، بەڵام نیوشای خوێندکار باوەڕی بە بەرنامەی پارتی FDPی ئەڵمانی هەیە.

 

ئەو بەربژێرە کوردەی پارتی دیموکراتی ئازاد - لیبراڵی ئەڵمانیا ئاماژەی بەوە کرد، "ئەم حیزبەم هەڵبژاردووە، چونکە بیروباوەڕەکانی لەگەڵ بیروباوەڕی گەنجێکی وەکو من دەگونجێت، بۆ نموونە ئەم حیزبە باوەڕی وایە کە تاک شان بداتە بەر بەرپرسیارێتی، لە هەمان کاتدا باوەڕی بە ئازادی هەیە و دەیەوێت دەرفەتی یەکسان بڕەخسێنێت."

 

لە کوێلن، کە یەکێکە لە شارە سەرەکییەکانی نیشتەجێبوونی کورد لە ئەڵمانیا، بەربژێریان لەنێو هەموو پارتە سەرەکییەکاندا هەیە بۆ ئەنجوومەنە جیاوازەکان.