رووداو دیجیتاڵ
ئەسعەد شەیبانی، وەزیری دەرەوە و کۆچبەرانی سووریا، لە کاتی بەشداریکردنی لە کۆنفرانسی ئاسایشی میونشن، تیشکی خستە سەر بارودۆخی وڵاتەکەی و رایگەیاند، سووریا لە قۆناخێکی پڕ لە ئاستەنگدایە. شەیبانی ئیسرائیلی تۆمەتبار کرد بەوەی لە دوای 8ی کانوونی یەکەمی 2024ـەوە، زیاتر لە هەزار هێرشی ئاسمانیی کردووەتە سەر خاکەکەیان.
بنیاتنانەوەی دەوڵەت و متمانە
وەزیری دەرەوەی سووریا لە گوتارەکەیدا ئاماژەی بەوە کرد، ساڵی رابردوو وێڕای دەستکەوتەکان، ساڵێکی بێ کێشە نەبووە و گوتی: "کارمان کردووە بۆ دووبارە بنیاتنانەوەی پێکهاتەی دەوڵەت و دروستکردنەوەی متمانە لەنێوان حکومەت و گەل دا."
ئاماژەی بەوەش کرد، "رژێمی پێشوو بۆ ماوەی 14 ساڵ دۆخی دابەشبوونی چەسپاندبوو، بەڵام دوای سەرکەوتنی شۆڕش، بیرۆکەی ئەوەی کە چەک تەنیا لەدەستی دەوڵەتدا بێت جێگیر کرا."
وڵاتێکی شەکەت و کۆمەڵگەیەکی پارچەپارچە
شەیبانی وەسفی دۆخی نێوخۆیی سووریای کرد و رایگەیاند: "ئێمە لە وڵاتێکدا دەژین بەهۆی شەڕ و ئەو بەڕێوەبردنە خراپەی لە رژێمی پێشووەوە بۆمان ماوەتەوە، ماندوو بووە. کۆمەڵگەی سووریا لە نێوان ناوخۆ و دەرەوەدا دابەش بووە؛ رووبەڕووی سەختیی مرۆیی و داڕمانی ژێرخان بووینەتەوە."
وەزیری دەرەوەی سووریا جەختی لەوەش کردەوە، هێزی سەرەکییان گەلی سووریایە و گوتی: "پشتمان بە گەلێک بەستووە کە ئیرادە و ئاواتی گەورەی هەیە. ئێمە سوودمان لە ئەزموونە جیاوازەکانی ناوچەکە وەرگرتووە، چ ئەوانەی سەرکەوتوو بوون و چ ئەوانەشی شکستیان هێناوە."
بەرپرسیارێتی بەرامبەر سوەیدا
سەبارەت بە دۆخی ناوچە جیاوازەکان، شەیبانی رایگەیاند، دەوڵەتی سووریا لە بەرپرسیارێتیی خۆی بەرامبەر بەو رووداوانەی لە سوەیدا و ناوچەکانی دیکە روویانداوە، خۆی نەدزیوەتەوە، چونکە هەمیشە بەرژەوەندیی نیشتمانی و بەرژەوەندیی گەل لە سەرووی هەموو شتێکەوە بووە.
هەروەها فرەچەشنیی سووریای وەک سەرچاوەی هێز وەسف کرد و گوتی: "ئێمە لەسەر بەرژەوەندیی باڵا رێککەوتووین، کە گرنگترینیان یەکپارچەیی خاکی سووریا و سەلامەتییەکەیەتی. کارەکانمان لەژێر چەتری یاسادایە و ئەمەش پێویستی بە کولتوورێکی سیاسیی نوێ هەیە."
هێرشەکانی ئیسرائیل و "داگیرکاریی نوێ"
بەشێکی سەرەکیی گوتەکانی وەزیری دەرەوەی سووریا تایبەت بوو بە گرژییەکانی لەگەڵ ئیسرائیل. شەیبانی ئاشکرای کرد کە سوورییەکان بەدەست کردەوەکانی ئیسرائیلەوە دەناڵێنن و گوتی: "لە دوای 8ی کانوونی یەکەمی 2024ـەوە، سووریا زیاتر لە 1000 جار لە رێگەی ئاسمانییەوە کراوەتە ئامانج. جگە لەوەش، ئیسرائیل خاکی نوێی لە باشووری سووریا داگیر کردووە، خەڵکی دەستگیر کردووە و زیاتر لە 500 هێرشی وشکانیشی ئەنجامداوە."
شەیبانی روونیکردەوە کە سووریا سیاسەتێکی "واقیعیی" بەرامبەر ئیسرائیل گرتووەتەبەر و دەیەوێت سەرنجی لەسەر ئاوەدانکردنەوە و گەشەپێدان بێت، بەڵام پێیوایە "ئەمە بەدڵی ئیسرائیل نییە، چونکە ئەو وڵاتە هەمیشە بەدوای ململانێی لاوەکیدا دەگەڕێت لە ناوچەکەدا."
مەرجەکانی دانوستاندن و ئاییندەی سووریا
لەبارەی دانوستاندنەکانەوە، وەزیری دەرەوەی سووریا جەختی کردەوە کە هێشتا نەگەیشتوونەتە ئاستی قبووڵکردنی ئەو "ئەمری واقیعەی" ئیسرائیل لە باشوور دروستی کردووە. گوتیشی: "کۆتایی هەر دانوستاندنێک دەبێت کشانەوەی ئیسرائیل بێت لەو ناوچانەی دوای 8ی کانوونی یەکەم داگیری کردوون، هەروەها راگرتنی دەستوەردان و پێشێلکردنی سەروەریی سووریا."
ئەسعەد شەیبانی ئاماژەی بەوە کرد، "هەڵگرتنی سزا ئابوورییەکان" کلیلە بۆ ئاوەدانکردنەوەی وڵات و گەڕانەوەی ئاوارە و پەنابەران. دووپاتیشی کردەوە کە سوورن لەسەر بنیاتنانی "سووریایەکی نوێ" کە ئامادەی هاوکاری و کارکردن بێت لەگەڵ هەموو لایەکدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ