وەزارەتی دەرەوەی لیتوانیا بۆ رووداو: دەمانەوێت پەیوەندییە بازرگانییەکانمان لەگەڵ هەرێمی کوردستان بەرەو پێش ببەین

 

بەشی راگەیاندنی وەزارەتی دەرەوەی لیتوانیا لە وەڵامی ئیمەیڵێکی تۆڕی میدیایی رووداو سەبارەت بە گفتوگۆکانی ئاشتی ئۆکراینا و رووسیا بۆ ئاگربەست رایگەیاند، "لیتوانیا بەشداری راستەوخۆی گفتوگۆکانی ئاگربەست نییە، بەڵام بە تووندی پاڵپشتیی هەوڵە نێودەوڵەتییەکان بۆ دەستەبەرکردنی ئاشتییەکی درێژمەودا، دادپەروەر و گشتگیر لە ئۆکراینا دەکەین، ئاشتییەک کە ببێتە مایەی رێزگرتن لە یاسای نێودەوڵەتی، سەروەری ئۆکراینا و یەکگرتووی خاکەکەی بە گوێرەی سنوورە دانپێداندراوە نێودەوڵەتییەکان."

 

وەزارەتەکە دەشڵێت، "داوا لە حکومەتی هەرێمی کوردستان لە عێراق و هەموو خەڵکە نیەتباشەکان دەکەین پاڵپشتی مەعنەوی ئەو بنەمایانە بکەن و هاوکاری ئۆکراینا بکەن بۆ کۆتاییهێنان بە شەڕانگێزییەکان".

 

 

وەزارەتی دەرەوەی لیتوانیا لە وەڵامی رووداو دا ئاماژەی بەوەشکرد، "لیتوانیا درێژە بە پەیوەندییەکی بنیاتنەرانە و گەشەسەندوو لەگەڵ حکومەتی هەرێمی کوردستان لە عێراق دەدات." جەختی لەوەش کردەوە، "کراوەیی و ئەو ویستە باشەی لەلایەن بەرپرسانی حکومەتی هەرێمی کوردستان لەکاتی کۆبوونەوەکانماندا پیشاندراوە بە گرنگ دادەنێین. سەردانی ئەم دواییانەی بەرپرسانمان بوونەتە هۆی بنەمایەک بۆ بەهێزکردنی هاوئاهەنگی."

 

تشرینی دووەمی 2024 و ئاداری ئەم ساڵ، راموناس داڤیدۆنیس، باڵیۆزی لیتوانیا لە عێراق سەردانی هەرێمی کوردستانی کرد و لەگەڵ سەفین غەفور، راوێژکاری جێگری سەرۆکی حکومەتی هەرێمی کوردستان و دارا رەشید، وەزیری پلاندانان کۆبووەوە.

 

ساڵی 2022ش گابرێلیوس لاندسبەرگ، وەزیری پێشووی دەرەوەی لیتوانیا سەردانی هەرێمی کوردستانی کرد و لەگەڵ نێچیرڤان بارزانی، سەرۆکی هەرێمی کوردستان، مەسرور بارزانی، سەرۆکی حکومەتی هەرێمی کوردستان و سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان کۆبووەوە.

 

وەزارەتی دەرەوەی لیتوانیا دەڵێت، "ئەو کۆبوونەوانە ویستی هەردوولا بۆ بەهێزکردنی هاوئاهەنگی بەتایبەت لە بوارەکانی ژێرخان، کشتوکاڵ و دەستپێشخەرییە ئابوورییە دیجیتاڵییەکان دەکات". 

 

وەزارەتی دەرەوەی لیتوانیا ئەوەشی خستەڕوو، ‎"لیتوانیا بەدوای دەرفەتەکاندا دەگەڕێت بۆ بەرەوپێشبردنی پەیوەندییە ئابوورییەکانی لەگەڵ حکومەتی هەرێمی کوردستانی عێراقدا. باوەڕمان وایە دەرفەت بۆ کۆمپانیا لیتوانییەکان بەتایبەت لە بوارەکانی ژێرخان و نوێگەریی دیجیتاڵیدا هەیە. ئامادەین پاڵپشتی شاندە بازرگانییەکان لە کاتی سەردانە فەرمییەکاندا بکەین و هانی ئاڵوگۆڕی زانیاریش لە رێگەی ویبنار، پیشاندانی ژینگەی ئابووریی حکومەتی هەرێمی کوردستان بۆ هاوئاهەنگی لەگەڵ هاوتا لیتوانییەکانیان و بە پێچەوانەوەش بکەین".

 

 

وەزارەتی دەرەوەی لیتوانیا ئاماژەی بە جەنگی ئۆکراینا کرد و رایگەیاند، لیتوانیا بە تووندی پابەندە بە پاڵپشتیکردنی ئۆکراینا و بەردەوامی بە پاڵپشتی سیاسی، سەربازی، ئابووری و مرۆیی خۆی بۆ ئۆکراینا دەدات." دەشڵێت،"0.25٪ـی کۆی بەرهەمی ناوخۆیمان بۆ پاڵپشتیکردنی ئاسایشی ئۆکراینا دابین کردووە". 

 

بڕیارە ئەمڕۆ لە تورکیا هەردوو شاندی ئۆکراینا و رووسیا بۆ گفتوگۆی ئاشتی کۆببنەوە. کۆبوونەوەکە لە کاتێکدایە ئەمریکا و وڵاتانی دیکەش هەوڵ بۆ کۆتاییهێنان بە جەنگەکە دەدەن.

 

سەبارەت بە راگەیاندنی ئاگربەست و کۆتاییهێنان بە جەنگەکە، وەزارەتی دەرەوەی لیتوانیا دەڵێت: "ئاشتییەک کە دادپەروەر و درێژمەودا نەبێت مەترسی جدی لەسەر ئاسایشی ئەورووپا و جیهان دروست دەکات".

 

 

وەزارەتی دەرەوەی لیتوانیا لەبارەی پەیوەندییەکانیان لەگەڵ سووریا رایگەیاند، "لیتوانیا بە هاوئاهەنگی لەگەڵ یەکێتیی ئەورووپا بە گرنگییەوە لە قۆناخی راگوزەری سووریا دەڕوانێت، بەبێ دەستوەردانی دەرەکی و پاراستنی مافەکانی هەموو سووریاییەکان بەبێ رەچاوکردنی ئایین و نەتەوە".

 

وەزارەتەکە هەروەها دەڵێت: "پاڵپشتی تەواوەتی سەربەخۆیی، سەروەری و یەکگرتوویی خاکی سووریا بە گوێرەی سنوورە دانپێداندراوە نێودەوڵەتییەکان و یاسای نێودەوڵەتی دەکەین". 

 

کانوونی یەکەمی رابردوو، گرووپە چەکدارە ئۆپۆزیسیۆنەکانی ئەو کاتی سووریا رژێمی ئەسەدیان رووخاند. دواتر، حکومەتێکیان لەو وڵاتە پێکهێنا.