ترەمپ کۆبوونەوە لەنێوان پووتین و زیلینسکی رێکدەخات

 

 

لە پۆستێکدا لەسەر پلاتفۆرمی سۆشیال میدیای خۆی (تروس سۆشیال)، ترەمپ گوتی کە گفتوگۆکان تیشکیان خستووەتە سەر گەرەنتییە ئەمنییەکان بۆ ئۆکراینا، کە لەلایەن وڵاتانی ئەورووپاوە بە هەماهەنگیی ویلایەتە یەکگرتووەکان دابین دەکرێن. لە نێو ئامادەبوواندا سەرۆکی فەڕەنسا ئیمانوێل ماکرۆن، سەرۆکی فینلاند ئەلێکساندەر ستوب، سەرۆک وەزیرانی ئیتاڵیا جۆرجیا مێلۆنی، سەرۆک وەزیرانی بەریتانیا کیەر ستامەر، راوێژکاری ئەڵمانیا فریدریش مێرز، سەرۆکی کۆمیسیۆنی ئەورووپا ئورسولا ڤۆن دێر لاین، و سکرتێری گشتیی ناتۆ مارک روتە هەبوون.

 

ترەمپ نووسیویەتی: "هەمووان زۆر دڵخۆشن بە ئەگەری ئاشتی بۆ رووسیا/ئۆکراینا"، و جەختی لەوە کردەوە کە گفتوگۆکان بە گەشبینییەکی وریایانەوە کۆتاییان هاتووە. هەروەها گوتیشی کە جێگری سەرۆک جەی دی ڤانس، وەزیری دەرەوە مارکۆ روبیۆ، و نێردەی تایبەت ستیڤ ویتکۆف، هەماهەنگییەکانی دواتر لەگەڵ کیێڤ و مۆسکۆ بەڕێوە دەبەن.

 

ترەمپ هەروەها ئاشکرای کرد کە دوای کۆبوونەوەکان پەیوەندیی تەلەفۆنیی بە سەرۆکی رووسیا ڤلادیمیر پووتینەوە کردووە، بۆ دەستپێکردنی ئامادەکارییەکان بۆ کۆبوونەوەیەکی راستەوخۆی نێوان پوتین و زیلینسکی. گوتیشی کە هەرکاتێک ئەو دیدارە ئەنجام درا، بەنیازە میوانداریی کۆبوونەوەیەکی لوتکەی سێقۆڵی لەگەڵ هەردوو سەرکردەکەدا بکات.

 

سەرکردە ئەورووپییەکان لە کۆشکی سپی جەختیان لە پابەندبوونی خۆیان بە ئاسایشی ئۆکراینا کردەوە، لەکاتێکدا زیلینسکی گفتوگۆکانی بە بنیاتنەرترین گفتوگۆ وەسف کرد لەوەتەی جەنگەکە دەستی پێکردووە. ئاماژەی بەوەش کرد کە رەنگە چوارچێوەیەک بۆ گەرەنتییەکان لە ماوەی چەند رۆژێکی کەمدا کۆتایی پێ بهێنرێت.

 

کرێملین هێشتا بە فەرمی هیچ پابەندبوونێکی بە کۆبوونەوە سێقۆڵییە پێشنیازکراوەکە پشتڕاست نەکردووەتەوە.