هەڵەیەک روویدا! دووبارە هەوڵبدە
جیهان
رەجەب تەیب ئەردۆغان، سەرۆککۆماری تورکیا لەکاتی پێشکێشکردنی گوتار لە نەتەوە یەکگرتووەکان. وێنە: Celal Güneş/AA
رووداو دیجیتاڵ
سەرۆککۆماری تورکیا لە گوتارەکەی دا لە کۆبوونەوەی کۆمەڵەی گشتیی نەتەوە یەکگرتووەکان باسی لە دۆخی سووریا کرد و گوتی، ئەو وڵاتە لە ژێر چنگی "تیرۆریستان و جوداخوازان" دایە.
رەجەب تەیب ئەردۆغان، سەرۆککۆماری تورکیا ئەمڕۆ سێشەممە 24-9-2024 لە 79یەمین کۆبوونەوەی کۆمەڵەی گشتیی نەتەوەیەکگرتووەکاندا گوتاری خۆی پێشکێشکرد و باسی لە چەند بابەتێکی تایبەت بە رۆژەڤی وڵاتانی جیهان کرد.
سەرۆککۆماری تورکیا بەشی هەرەزۆری گوتارەکەی تایبەت بە شەڕی نێوان ئیسرائیل و حەماس و لە بەشێکیشیدا باسی لە دۆخی سووریا کرد و رایگەیاند، 14 ساڵ بەسەر شەڕەکەدا تێپەڕیوە، بەڵام هێشتا دۆخی ئەو وڵاتە سەقامگیر نییە.
تورکیا بەردەوام نیگەرانیی خۆی لەبارەی بەڕێوەبەرایەتیی خۆسەر نیشاندەدات و زوو زوو هەڕەشەی ئۆپەراسیۆنیش بۆ ناوچەکانی ژێر دەسەڵاتی دەکات.
ئەردۆغان ئەو تۆمەتە دەداتە پاڵ بەڕێوەبەرایەتیی خۆسەر کە هەوڵی "جوداخوازی" دەدات و رەخنە لە ویلایەتە یەکگرتووەکانی ئەمریکاش دەگرێت لە بەرامبەر یارمەتیدانی شەڕڤانان و کارکردن لەگەڵیان.
ئەردۆغان لە گوتارەکەیدا ناوی بەڕێوەبەرایەتی خۆسەری نەبرد، بەڵام گوتی، "لەو وڵاتەی لە ژێر چنگی تیرۆر و رێکخراوە جوداخوازەکاندایە، دۆخی ئابووری و مرۆیی خراپە. هیوادارین لە سەر بنەمای بڕیاری 2254ی ئەنجوومەنی ئاسایشی نەتەوە یەکگرتووەکان، بەرەوپێشچوونی دۆخی سیاسی و سازانی نیشتمانی بەدی بێت. ئێمە لەگەڵ دیالۆگێکی راستەقینە و راستگۆیانەداین. لەسەر ئەم هەڵوێستەمان بەردەوامین و پێداگرین لەسەری."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ