رووداو دیجیتاڵ
پەرلەمانی ئەورووپا بڕیارنامەیەکی دژی ئێران پەسند کرد و تێیدا داوا لە یەکێتیی ئەورووپا دەکات، گەمارۆی زیاتر بخاتە سەر ئێران و سوپای پاسداران بە گرووپێکی تیرۆریستی بناسێنێت.
لە کۆبوونەوەی ئەمڕۆ پێنجشەممەی پەرلەمانی ئەورووپادا، بڕیارنامەی وەڵامدانەوە بە هێرشی ئێران بۆ سەر ئیسرائیل خرایە دەنگدان و بە دەنگی 357 پەرلەمانتار لە کۆی 435 پەرلەمانتاری بەشداربوو، بڕیارنامەکە پەسندکرا. 20 پەرلەمانتار بە دژ و 58یش بە بێلایەن دەنگیان دا.
لە بڕیارنامەکەدا داوا لە یەکێتیی ئەورووپا کراوە، پێداچوونە بە ستراتیژی خۆی بەرامبەر تاراندا بکات، گەمارۆی زیاتر بخاتە سەر ئێران و سوپای پاسداران وەکو گرووپێکی تیرۆریستی بناسێنێت.
ئێران شەوی شەممە 13-04-2024 بە زیاتر لە 300 درۆن و مووشەک هێرشی کردە سەر ئیسرائیل. هێرشەکە زیانی گیانی نەبوو و تەنیا منداڵێک بریندار بوو. بەرپرسانی ئیسرائیل رایانگەیاند، 99٪ی مووشەک و درۆنەکان لە ئاسماندا تەقێندراونەتەوە.
ئێران رایگەیاند، هێرشەکە وەڵامی ئەو هێرشە بووە کە ئیسرائیل لە 1ی نیساندا کردییە سەر باڵەخانەی کاروباری کۆنسوڵخانەی ئێران لە دیمەشق و بەهۆیەوە 7 ئەندامی سوپای پاسداران کە دووانیان فەرماندەی باڵا بوون، کوژران.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ