رووداو دیجیتاڵ
لە بەندەری باڵتیمۆر لە ویلایەتی مێریلاندی ئەمریکا، کەشتییەکی بارهەڵگر خۆی بە پردێکدا کێشا و بەو هۆیەوە بەشێک لە پردەکە رووخا و چەند ئۆتۆمبێلێکیش کەوتنە نێو ئاوەوە.
بە گوتەی پۆلیسی کەناراوەکانی ئەمریکا، رووداوەکە کاژێر 01:27 خولەکی بەرەبەیانی رۆژی سێشەممە بە کاتی ئەمریکا [کاژێر 8:27 خولەک بە کاتی هەولێر] روویداوە.
ئەو پردەی کە بەهۆی رووداوەکەوە رووخاوە، بە پردی Francis Scott ناودەبرێت، لەسەر رووباری Patapsco دروستکراوە و درێژییەکەی 2.57 کیلۆمەترە.
بەرپرسانی باڵتیمۆر ئاماژە بەوە دەکەن، هەر کە کەشتییەکە خۆی بە پردەکەدا کێشاوە، دەستبەجێ پردەکە داڕماوە و لانیکەم حەوت کەس کەوتوونەتە نێو رووبارەکەوە.
جەیمس واڵاس، بەرپرسی دەزگای ئاگرکوژێنەوەی باڵتیمۆر رایگەیاند، توانیویانە دوو کەس لەنێو ئاوەکەدا دەربهێنن؛ یەكێکیان هیچ زیانێکی پێنەگەیشتووە و ئەوی دیکە بریندار بووە.
ویس مۆر، حاکمی ویلایەتی مێریلاند لە کۆنفرانسێکی رۆژنامەڤانیدا لەبارەی هۆکاری رووداوەکەوە گوتی، لێکۆڵینەوە سەرەتاییەکان ئەوە دەردەخەن کە کەشتییەکە بزووێنەرەکەی لەکارکەوتبوو، بەو هۆیەوە کۆنترۆڵی لەدەستداوە و خۆی بە پردەکەدا کێشاوە.
بەرپرسانی هێڵەکانی گواستنەوەی باڵتیمۆریش رایانگەیاند، بۆ ماوەیەکی کاتی هەموو گەشتەکانی بەندەرەکە دەوەستێندرێن.
جۆ بایدن، سەرۆکی ئەمریکا رووداوەکەی بە "دڵتەزێن" ناوبرد و ئاماژەی بەوەش کرد، کار دەکەن بۆ ئەوەی بە زووترین کات بەندەرەکە بکەوێتەوە کار.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ