هەڵەیەک روویدا! دووبارە هەوڵبدە
رووداو دیجیتاڵ
ئۆزگور چەلیک، سەرۆکی رێکخستنەکانی پارتی گەلی کۆماری (جەهەپە) لە ئیستەنبووڵ، دوای ئەوەی پێشتر قەییومی لەسەر دانرا. دووبارە بە سەرۆکی رێکخستنەکان هەڵبژێردرایەوە و بەڵگەنامەی دەستبەکاربوونی وەرگرت.
ئۆزگور چەلیک، دوای ئەوەی لە کۆنگرەی نائاساییدا دووبارە وەک سەرۆک هەڵبژێردرایەوە، ئەمڕۆ دووشەممە 29-9-2025 بۆ وەرگرتنی بەڵگەنامەی سەرۆکایەتییەکەی سەردانی ئەنجوومەنی هەڵبژاردنی ناوچەی ساریەری کرد.
دوای کاژێرێک و 20 خولەک چاوەڕوانی، ئۆزگور چەلیک بەڵگەنامەی دەستبەکاربوونی وەرگرت.
چەلیک لە لێدوانێکیدا بۆ رۆژنامەڤانان رایگەیاند، بۆ جاری دووەم هەڵبژێردراوەتەوە و بەڵگەنامەی سەرۆکایەتیی وەرگرتووە.
چەلیک گوتی: "رۆژی 2ی ئەیلوول بڕیارێک درا. بڕیاری 2ی ئەیلوول کێشەی زۆری بۆ بۆرسە دروستکرد و زیانی زۆری بە ئابووریی تورکیا گەیاند. لە ماوەی 10 رۆژی رابردوودا، بانکی ناوەندی ناچار بوو ملیاران دۆلاری یەدەک بفرۆشێت".
چی روویدابوو
رۆژی 8ی تشرینی یەکەمی 2023، کۆنگرەی ئاسایی 38ـەمینی پارتی گەلی کۆماری (جەهەپە) لە ئیستەنبووڵ بەڕێوەچوو و ئۆزگور چەلیک وەک سەرۆکی رێکخستنەکانی ئیستەنبووڵ ھەڵبژێردرا، بەڵام بەشێک لە ئەندامانی جەهەپە تۆمەتی ساختەکاری لە پرۆسەی دەنگدانیان دایە پاڵ ستافەکەی چەلیک و لە دادگە سکاڵایان تۆمارکرد.
داوای سزای زیندانیکردن لە ساڵێک بۆ سێ ساڵ بەسەر ئۆزگور چەلیک، سەرۆکی رێکخستنەکانی جەهەپە لە ئیستەنبووڵ و ژمارەیەک لە یاوەرانی کرا.
بەگوێرەی ئەو بڕیارەی رۆژی 2-9-2025 لەلایەن دادگە دەرچوو، ئۆزگور چەلیک و دەستەی کارگێڕیی لقی جەهەپەی ئیستەنبووڵ بە شێوەیەکی کاتی لە کارەکانیان دوورخرانەوە و دواتریش دەستەیەکی بەڕێوەبردنی کاتی وەکو قەییوم دانران.
هەروەها 196 ئەندامی دەستەی نوێنەرانی ریکخستنەکان، لە کارەکانیان دوورخرانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ