Erd û zeviyên Kurdan / Wêne: Ji ber dîmenan, Rûdaw
Hewlêr (Rûdaw) – Navçeya Xurmatûyê ya Kerkûkê li erd û zeviyan careke din bûye qada nakokî û aloziyan.
Hejmarek cotkarên Ereb ên hawirde bi piştgiriya Parêzgarê Selahedînê û artêşa Îraqê, hewl didin dest deynin ser 180 donim erdên ku dikevin nava sînorên 3 gundên Kurdan ên bi navê Tepesewz, Parepare û Elbû Sebahê.
Ev hewldan bi rêya îmzekirina heft girêbestan tê kirin ku beşek ji xwediyên erdan ên Kurd vê yekê red dikin.
Gefên valakirinê û zextên berdewam
Li gorî gotinên şêniyên gundan, heftane 2-3 caran hêzeke leşkerî ya Îraqê diçe gundan û daxwaza valakirina erdan dike.
Ednan Hemîdê ku şêniyê gundê Tepesewzê ye got:
"Her carê du otomobîlên Ereban tên, hêzeke mezin li pey wan tê.
Tapûyên me hene lê pê kar nayê kirin, girêbestên wan hene û her tişt ji wan re tê kirin."
Ednan Hemîd her wiha amaje pê kir ku ev çend car in tên û ew rê li ber wan digirin lê niha bi zor û zexta hêz û artêşê dixwazin li ser erdên wan sengeran çêbikin û rê li ber cotkarên Kurd bigirin.
Metirsiya berfirehbûna destdanînê
Cotkarên navçeyê dilgiran in ku destdanîna ser van 180 donim erdan dê rê li ber destdanîna ser 1800 donim erdên din ên li gundên Tepesewz, Parepare û Elbû Sebahê xweş bike.
Mecîd Hemîdê ku cotkar e bangî serkirdayetiya Kurdan kir ku bi hawara wan ve herin.
Mecîd Hemîd diyar kir ku artêşa Îraqê dixwaze li ser erdên wan sengeran çêbike ku wê demê ew dê nikaribin tiştekî bikin û dê rêya çûn û hatinê li wan were girtin.
Girêbestên bi nîqaş û zextên li ser cotkaran
Mendîl Wehabê ku ew jî cotkar e amaje pê da ku 7 girêbestan ji wan re pirsgirêkeke pir mezin çêkiriye û da zanîn:
"Rojane Hêzên Bersivdana Bilez, polîs û artêşê tînin ser me û dixwazin me ji erdên me derxin.
Em çi dikin nikarin ji vê pirsgirêkê rizgar bibin."
Hêzên ewlehiyê ji cotkarên wan her 3 gundan re gotiye ku yan divê ew belgeya destberdana wan erdan îmze bikin yan jî dê werin desteserkirin.
Cotkarên Kurd jî li ser wê yekê rijd in ku ew dest ji erdên bav û kalên xwe bernadin.
Helwesta Yekîtiya Niştimanî ya Kurdistanê (YNK)
Baregeha Hemrînê ya Yekîtiya Niştimanî ya Kurdistanê (YNK) ragihand ku eger zext ji vê zêdetir bibin, ew dê piştgiriya cotkarên Kurd bikin.
Mela Hesenê ku Kargêrê Baregeha Hemrînê ya YNKê ye anî ziman:
"Em hemû aliyên xebatê li ber çavan digirin, em dê bi cotkarên Kurd re xebatê bikin.
Ew 7 parçeyên erdan ên ku ew daxwaz dikin, xwediyên wan werin û mohra xwe bikin û dest jê berdin da ku radestî Ereban werin kirin, bi ti awayî xelkê me vê yekê qebûl nake û em dê piştgiriya wan bikin."
Rewşa aloz, pêşhateke nû ya germbûna pirsgirêkên xwedîlêderketina li erd û zeviyên li navçeyên nakok e ku pêwîstî bi çareseriyeke bingehîn û gotûbêjeke cidî heye da ku rê li ber zêdebûna aloziyan were girtin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse