Hewlêr (Rûdaw) - Li ser daxwaza Saziya Anonîm a Petrolên Tirkiyeyê (TPAO), derbarê qada wê ya di nav sînorên parêzgehên Amed û Mêrdînê yên Bakurê Kurdistanê biryara destdanînê hat dayîn.
Biryara destdanînê ya Rêveberiya Giştî ya Karûbarên Maden û Petrolê (MAPEG) a Wezareta Enerjî û Çavkaniyên Xwezayî îro di Rojnameya Fermî de hat weşandin.
Di hinceta biryarê de hat diyarkirin ku MAPEGê daxwaza TPAOyê nirxandiye.
Li gorî biryarê, dê ji bo xeta boriya petrolê û xeta veguhastina enerjiyê dest deynin ser erd û zeviyên pêwîst ên li gundê Bîrikê yê navçeya Bismilê.
Her wiha hat eşkerekirin ku ew dever ji bo karûbarên petrolê pêwîst in û di destdanîna wan de "berjewendiya giştî" heye.
Hat zanîn ku ji ber xwediyên erdan bihayekî zêde xwestiye, kirîna wan bi rêya lihevkirinê pêk nehatiye û lewma biryara destdanîna lezgîn hatiye dayîn.
Hat ragihandin ku ew qad dikevin nav sînorê ruxsata lêgerîna petrolê ya TPAOyê û tê plankirin ku bîrên bi navê "Kilavuztepe-6" û "Kilavuztepe-8" lê bên vekirin.
Beriya niha Wezîrê Enerjî û Çavkaniyên Xwezayî yê Tirkiyeyê ragihandibû ku bi taybetî li parêzgeha Amedê potansiyeleke mezin a petrolê heye û wan kar û xebatên lêgerînê berfirehtir kirine.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse