Hewlêr (Rûdaw) - Li Îraqê zêdetirî 11 milyon karmend û mûçexwir hene û mesrefê wan ê salane 72 trilyon dînar e.
Alîkarê berê yê Wezareta Darayî ya Îraqê Fazil Nebî ji Tora Medyayî ya Rûdawê re ragihand ku li Îraqê hejmareke zêde ya xelkê bûye karmend û mûçexwir û hejmara wan ji 11 milyonî zêdetir e.
Ji wê hejmarê zêdetirî 5 milyonan karmend in û 3 milyon jî malnişînên sivîl û leşkerî ne.
Berdevkê Wezareta Kar û Kar û Barên Civakî ya Îraqê Hesen Xewam jî îro ji Rûdawê re axivî û diyar kir ku li wezareta wan 2 milyon û 124 hezar malbat mûçeyê çavdêriya civakî werdigirin.
Li gorî zanyariyên Rûdawê, Wezareta Kar û Kar û Barên Civakî ya Îraqê mehane ji bo mûçeyê çavdêriya civakî pêdivî bi 420 heta 440 milyar dînarî heye.
Di yasaya budceya 3 salî (2023, 2024 û 2025) ya Îraqê de hejmara karmendan wekî 4 milyon û 74 hezar û 697 kes hatibû diyarkirin.
Endamê Komîteya Aboriyê ya Parlamentoya Îraqê Soran Omer ji Rûdawê re da zanîn ku Serokwezîrê Îraqê Mihemed Şiya Sûdanî tenê di budceya 3 salî de zêdetirî milyonek karmendên nû bi awayekî mayînde tayîn kirine.
Bi vê yekê hejmara karmendên mayînde gihîştiye zêdetirî 5 milyonan.
Soran Omer piştrast kir ku li Îraqê zêdetirî 11 milyon karmend û mûçexwir hene û ji bilî karmendên mayînde, malnişîn û çavdêriya civakî, zêdetirî milyonek mûçexwirên din jî hene.
Di nav wan de karmendên bi girêbest, zîndaniyên siyasî, xizmên şehîdan û çend beşên din hene.
Li gorî daxuyaniya Wezareta Darayî ya Îraqê ya ku doh hat belavkirin, ji bo mûçeyê mehane 6 trilyon dînar lazim in.
Di vî mûçeyî de yê karmend, malnişîn û tora çavdêriya civakî hene.
Bi vî awayî, Îraq ji bo mûçeyan salane pêdiviya wê bi 72 trîlyon dînarî heye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse