Cengîz Çandar / Wêne û Vîdeo: Rûdaw
Hewlêr (Rûdaw) - Parlamenterê DEM Partiyê Cengîz Çandar ragihand ku pêvajo di rêçika xwe ya asayî de didome û got, “Partiya desthilat dê li ser bingeha rapora Komîsyonê gavên pêwîst biavêje."
Parlamenterê DEM Partiyê yê Amedê Cengîz Çandar bû mêhvanê Rûdawê û bersiv da pirsên Dildar Herkî yên li ser rojevê.
“Ev nîşaneke gelekî girîng bû”
Vê duşemê (08.12.2025), dema nîqaşên budceyê yên li Parlamentoya Tirkiyeyê, Hevserokên Giştî yên DEM Partiyê Tulay Hatîmogullari û Tuncer Bakirhan merheba dabû Serokê Giştî yê MHPyê û wan rahiştibû destê hev.
Cengîz Çandar ev silavdayîn bi vî rengî şîrove kir:
"Li kulîsa Parlamentoyê rabûna wî û pîrozkirina Hevserokên Giştî yên DEM Partiyê Tulay Hatîmogullari û Tuncer Bakirhan, ne tenê merhebayeke asayî bû.
Ev nîşaneke gelekî girîng bû ku pêvajo didome û dê bi pêş ve biçe."
Çandar diyar kir ku pêvajo bi awayekî asayî didome û îşaret bi wê yekê kir ku di mehên Kanûna Paşîn û Sibatê de dibe ku li Parlamentoyê gotûbêjkirina pêşniyaryasayan dest pê bike.
Îmrali û xebatên Komîsyonê
Çandar diyar kir ku yek ji qonaxên herî krîtîk ên pêvajoya çareseriyê li paş maye.
Wî bi bîr anî ku şandeya sêkesî ya ku di bin banê Komîsyonê de hatiye avakirin (ji AK Partî, MHP û DEM Partiyê pêk hatibû) çûye Girava Îmraliyê û rû bi rû bi Abdullah Ocalan re hevdîtin kirine.
Çandar hûrgiliyên xebatên Komîsyonê parve kirin û ev agahî dan:
"Komîsyonê ji 5ê Tebaxê ve 19 civîn pêk anîn. Guhdarî li saziyên civaka sivîl û hemû hêmanên pêwendîdar hat kirin.
Her wiha 3 caran rûniştina girtî hat kirin û nirxandinên Wezîrê Parastinê û Serokê MÎTê hatin wergirtin.
Dema erkê Komîsyonê dê 31ê Kanûna Pêşîn bi dawî bibe. Îhtimaleke mezin e ku heta wê demê rapor were amadekirin."
“De gavên pêwîst biavêje”
Çandar behsa nexşerêya paşerojê ya pêvajoyê jî kir û got ku piştî temambûna rapora Komîsyonê dê xebatên yasadanînê dest pê bikin û xwe lê berda:
"Piştî ku rapor pêşkêşî Parlamentoyê hat kirin, gengaz e ku mehên kanûna paşîn û sibatê pêşniyarên qanûnî yên têkildarî pêvajoyê dê werin rojeva Parlamentoya Tirkiyeyê.
Partiya desthilatdar dê li ser bingeha rapora Komîsyonê gavên pêwîst biavêje."
"Nîqaşa girtenameyê hat derbaskirin”
Çandar behsa nîqaşa "kurteya metnê" ya derbarê girtenameyên hevdîtina Îmraliyê jî kir û da zanîn ku ev rewş bandorê li pêvajoyê nake û li pey şitexaliyê çû:
"Hevdîtina li Îmraliyê hat tomarkirin (deng) û di metneke 16 rûpelî de hat nivîsandin.
Her 3 parlamenterên ku beşdarî hevdîtinê bûbûn jî ev girtename bi gotina 'Hevdîtin bi vî rengî pêk hatiye’ îmze kir.
Lê dema ku nexwestin hemû girtename were weşandin, kurteyek hat derxistin.
Parlamentera DEM Partiyê Gulistan Kiliç Koçyîgîtê bi sedema ku ev kurte rastiyê tam nade der îtiraz kir.
Min wê gavê got 'Qîmetê vê kurteyê ya belgeyî nîne.' Niha ev nîqaş hatiye derbaskirin û pêvajo ber bi pêş ve didome."
"Silava Bahçelî peyama bipêşveçûna pêvajoyê ye"
Çandar bal kişand ser rola Devlet Bahçelî ya di pêvajoyê de û diyar kir ku bûyera destşidandinê ya li Parlamentoyê peyameke xurt a siyasî hildigire:
"Bêyî Devlet Bahçelî ev pêvajo nedigihişt vê qonaxa îro.
Li kulîsa Parlamentoyê rabûna wî û pîrozkirina Hevserokên Giştî yên DEM Partiyê Tulay Hatîmogullari û Tuncer Bakirhan, ne tenê merhebayeke asayî bû.
Ev nîşaneke gelekî girîng bû ku pêvajo didome û dê bi pêş ve biçe."
"CHP piştgiriyeke tam dide"
Çandar herî dawî helwesta CHPyê nirxand û diyar kir ku Serokê Giştî yê CHPyê Ozgur Ozel piştgiriyê dide pêvajoyê û got:
"Ozgur Ozel di axaftina xwe ya li parlamentoyê de eşkere kir ku ew dê di Komîsyonê de bimînin û her cure tevkariyê li pêvajoyê bikin. Ev peyameke gelekî erênî bû."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse