Stephane Dujarric: Piştgiriya me ji bo veguherîna siyasî ya Sûriyeyê didome

Hewlêr (Rûdaw) - Berdevkê Sekreterê Giştî yê Neteweyên Yekbûyî Stephane Dujarric ragihand ku piştgiriya wan ji bo veguherîna siyasî li Sûriyeyê didome.

Berdevkê Sekreterê Giştî yê Neteweyên Yekbûyî Stephane Dujarric ragihand ku du nûnerên pilebilind ên Neteweyên Yekbûyî li Sûriyeyê ne.

Berdevkê Sekreterê Giştî yê Neteweyên Yekbûyî Stephane Dujarric di bersiva pirsa Rûdawê de hûrgiliyên serdanên nûnerên Neteweyên Yekbûyî eşkere kirin.

Stephane Dujarric ragihand ku Neteweyên Yekbûyî bi rêya dîplomasiyê hewl dide pêvajoya veguhastina siyasî ya li Sûriyeyê xurt bike.

Bi gotina Stephane Dujarric di heman demê de parastina zarokan ji bandorên şer û metirsiya mayînan jî di rojeva wan de ye.

Cordone li Şamê ye

Stephane Dujarric diyar kir ku Alîkarê Nûnerê Taybet ê Neteweyên Yekbûyî Claudio Cordone niha li Şamê ye.

Li gorî daxuyaniyê, Cordone bi berpirsên hikûmeta Sûriyeyê, kesayetiyên siyasî, saziyên Neteweyên Yekbûyî û endamên civaka sivîl re dicive.

Dujarric got, "Gotûbêj tekezî li ser piştgiriya nûnerê Neteweyên Yekbûyî ya ji bo pêvajoya veguhastina siyasî ya Sûriyeyê dikin."

Metirsiya mayînan li ser zarokan

Li aliyê din, Nûnera Taybet a ji bo Karûbarên Zarokan û Pevçûnên Çekdarî Vanessa Frazierê jî ziyareta xwe ya 3 rojan a Sûriyeyê bi dawî kir.

Frazierê di ziyareta xwe de bal kişand ser metirsiya mayîn û teqemeniyên neteqiyayî.

Wê bang li welatên pêwendîdar kir ku ji bo çareserkirina vê pirsgirêka hestiyar piştgiriyê bidin.

Pirsa Kobaniyê

Nûçegihana Rûdawê di civîna çapemeniyê de pirsî, "Gelo Cordone plan dike biçe Kobaniyê?"

Stephane Dujarric di bersiva xwe de diyar kir ku hûrgiliyên bernameya Cordone li cem wî nînin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger