محەممەد ئەمین، پسپۆڕی بازاڕە داراییەکان
رووداو دیجیتاڵ
شارەزایەکی ئابووری دەڵێت، ئەگەر هیچ دەستوەردانێک نەکرێت، دەبێت نرخی زێڕ دابەزێت. خوولێکی فێربوونی بازاڕەکانیش بەخۆڕایی رادەگەیێنێت.
د. محەممەد ئەمین، پسپۆڕی بازاڕە داراییەکان کە بە د. ترەیدەر ناسراوە گوتی، "ئێمە ئێستا لە جیهانی ترەمپیدا دەژین و خەریکە هەندێک شڵەژان لە بازاڕە ئابوورییەکان دروست دەبێت، بۆ نموونە دوێنێ دۆناڵد ترەمپ، سەرۆکی ئەمریکا لە پۆستێکدا گوتی، هێرش دەکەینە سەر ڤەنزوێلا، بەڵام واینەکرد".
د. ترەیدەر گوتی، ئەم جۆرە بابەتانە خەریکە بازاڕ زۆر دەشێوێنن' بۆ نموونە دوێنێ نرخی بیتکۆین لە [ئاستی] 91 هەزار دۆلارەوە بۆ 87 هەزار دۆلار دابەزی. بەوەش ئەوانەی مامەڵەی کڕینی بیتکۆینیان کردبووەوە، 75 ملیۆن دۆلار زەرەریان کردووە. دواتر نرخی بیتکۆین لە 87 هەزار دۆلارەوە زیاتر لە سێ هەزار دۆلار بەرزبووەوە. بەوهۆیەشەوە بازرگانان نزیکەی 100 ملیۆن دۆلار زەرەریان کرد".
"سەرووی 4200 دۆلار ئاماژەیەکی باشە"
ئەمڕۆ لە یەکەمین رۆژی کرانەوەی بازاڕەکانی جیهاندا، نرخی ئۆنسەیەک زێڕ زیاتر لە 10 دۆلار بەرزبووەتەوە و بە 4211 دۆلارە. رۆژی هەینی لەکاتی داخرانی بازاڕەکان، ئۆنسەیەک زێڕ بە 4198 دۆلار بوو.
د. ترەیدەر دەڵێت، "گەیشتنەوەی زێڕ بۆ ئاستی سەرووی 4200 دۆلار، ئاماژەیەکی باشە بەوەی دەکرێت نرخەکەی بگاتە 4240 دۆلار بۆ 4250 دۆلار".
ئەو پسپۆڕە باسی لەوەشکرد، بۆ کاتی ئێستا، "پێشنیازی مامەڵەکردن بۆ کەس ناکات"، چونکە کۆتاییەکانی ساڵە و رەنگە بازاڕ جێگیر نەبێت.
د. محەممەد ئەمین دەشڵێت، بۆ ئەوانەش کە دەیانەوێت مامەڵە بکەن، لە ئەگەری بەرزبوونەوەی، دەکرێت نرخی زێڕ بگاتە ئاستی 4240 بۆ 4242 دۆلار. گوتیشی، مەرج نییە بگاتە ئەم نرخە، بەڵام ئەگەر گەیشت، دەکرێت لەوێوە دابەزینێک بکات و ببێتە وێستگەی فرۆشتن.
لەبارەی ئەگەری دابەزینیشەوە د. ترەیدەر دەڵێت، "دەکرێت زێڕ بۆ 4171 بۆ 4169 دۆلار دابەزێت، ئەو ئاستە یەکەمین ناوچەی گونجاوی کڕینی زێڕ دەبێت"
پسپۆڕەکەی بازاڕە داراییەکان گوتیشی، ئێستاش دوور نییە نرخی ئۆنسەیەک زێڕ بۆ ئاستی خوار 4000 دۆلار دابەزێت، بەڵام رەنگە بەرزبوونەوەیەک بکات سەرەتا بۆ ئەوەی خەڵکی زیاتر زێڕ بکڕن.
د. محەممەد ئەمین دەڵێت، "نرخی ئێستای زێر واقیعی نییە و دەبێت دابەزێت، ئەگەر هیچ دەستوەردانێکی سیاسی نەبێت، بەتایبەتی لە لایەن ترەمپەوە".
قسەکانی د. ترەیدەر ئەمڕۆ دووشەممە لە بڕگەی "شەتڕەنج لەگەڵ د. ترەیدەر" لە کاتی پێشکێشکردنی بووڵتەنی ئابووریی لەگەڵ محەممەد شێخ فاتیح بوو.
"بیتکۆین دەبێت سەرەتا 93-94 هەزار دۆلار بشکێنێت"
ئەمڕۆ نرخی بیتکۆین 1300 دۆلار بەرزبووەتەوە و بە 91 هەزار و 699 دۆلارە.
د. ترەیدەر پێیوایە، ئێستاش ئاستی 93 هەزار بۆ 94 هەزار دۆلار، بەربەستێکی زۆر گرنگە لەبەردەم بیتکۆین و، بۆ بەرزبوونەوەی زیاتر دەبێت سەرەتا ئەو ئاستە بشکێنێت
"باشترە بینەر بین"
د. ترەیدەر هۆشداری دەدات لەوەی ئەوانەی مامەڵە دەکەن "دەبێت زۆر زۆر وریا بن، چونکە وردە وردە لە کۆتایی ساڵ نزیکدەبینەوە و قەبارەی مامەڵەکان کەم دەبێتەوە؛ بانکەکان مامەڵەکانیان دادەخەن و پارە لە بازاڕ دەهێننە دەرەوە، بۆیە پارەیەکی کەم لە بازاڕەکان دەمێنێتەوە".
پسپۆڕەکە گوتیشی، "بەهۆی ئەوەی قەبارەی مامەڵەکان و پارەی نێو بازاڕ کەمدەبنەوە، جووڵەکان سەیر و نائاسایی دەبن، بۆ نموونە ئەگەر پێشتر نرخی زێڕ بۆ جووڵەیەکی دیاریکراو پێویستی بە 500 ملیۆن دۆلار بووایە، لە کۆتاییەکانی ساڵدا هەمان جووڵە بە 50 ملیۆن دۆلار روودەدات".
"ئەو کانزایەی کەس باسی باکات"
د. ترەیدەر دەڵێت، بە بڕوای ئەو، مس کانزایەکی باشە بۆ کڕین و خۆی لە چەند نرخێک، گرێبەستەکانی داهاتووی ئەو کانزایەی کڕیوە.
ئەو پسپۆڕە ئاماژەی بەوەشکرد، بۆیە ئەو کانزایەی کڕیوە، چونکە خەڵک لێی دوورە و کەس باسی ناکات. کانزاکەش خەریکە بەهێمنی دەچێتە نێو پیشەسازییە جیاجیاکانەوە.
د. محەممەد ئەمین دەڵێت، ئێستا مس زیاتر لە پیشەسازیی چیپی ئەلیکترۆنی و ژیریی دەستکرد بەکاردەهێندرێت.
دەرفەتێکی نوێ
بڕگەی "شەتڕەنج لەگەڵ د. ترەیدەر" دەرفەتێکی نوێ بەخۆڕایی بۆ ئەو گەنجانە دەڕەخسێنێت کە خوازیاری فێربوونی بازاڕە ئابووری و داراییەکانن، ئەویش خوولێکی فێربوونە. رۆژانی داهاتووش مەرجەکان و شێوازی بەشداربوون بڵاودەکرێنەوە.
د. ترەیدەر دەڵێت، "دەمانەوێت دەرفەت بۆ گەنجان بڕەخسێنین و پاڵپشتییان بکەین بۆ ئەوەی بەشداربن لە یەکەم زانکۆی ئابووری و واقیعیی بازاڕ، واتە مامەڵەی ئابووری بکەن نەک تەنیا کڕین و فرۆشتن لە بازاڕەکان". ئەو پسپۆڕە گوتی، "دەمانەوێت ئابووریناس دروست بکەین".
د. محەممەد ئەمین لە رۆژانی رابردوودا بووەتە ئەندامی 'کۆڕبەندی ئابووریی جیهانی [WEF]. کۆڕبەندەکە ئەو کەسانە دەکاتە ئەندام کە لە رووی ئابوورییەوە کاریگەرن.
کۆڕبەندی ئابووریی جیهانی رێکخراوێکی نێودەوڵەتیی قازانجنەویستە، کە سەرانی بازرگانی، حکومەت، کەسانی ئەکادیمی و کۆمەڵگەی مەدەنی لەخۆدەگرێت. ئامانجی چارەسەری کێشە بنەڕەتییەکانی جیهانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ