رووداو دیجیتاڵ
رۆژی دووشەممە، 16-06-2025، بەهۆی جەنگی نێوان ئیسرائیل و ئێرانەوە، نرخی نەوت لە بازاڕەکانی جیهاندا بەرزبوونەوەیەکی بەرچاوی بەخۆوە بینی و نیگەرانیی لەبارەی پەککەوتنی هەناردەی وزە لە رۆژهەڵاتی نێوەڕاست دروستکرد.
نرخی یەک بەرمیل نەوتی خاوی برێنت بە رێژەی 2.8% بەرزبووەوە و گەیشتە 76.37 دۆلار. هاوکات، نرخی نەوتی خاوی ئەمریکاش نزیکەی دوو دۆلار بەرزبووەوە و بە 75.01 دۆلار مامەڵەی پێوەکرا.
ئەم بەرزبوونەوەیە دوای ئەوە دێت کە رۆژی هەینی نرخی نەوت بە رێژەی 7% بەرزبووەوە.
بازرگانان و شرۆڤەکارانی بواری وزە نیگەرانن لەوەی کە شەڕی نێوان ئێران و ئیسرائیل ببێتە هۆی پەککەوتنی هەناردەکردنی نەوت لە ناوچەکەدا. بەرزبوونەوەی نرخی نەوتی خاو کاریگەریی راستەوخۆی لەسەر نرخی سووتەمەنیی ئۆتۆمبێل و نرخی خۆراک لە مارکێتەکاندا دەبێت.
بەرزبوونەوەی نرخی نەوت هاوکاتە لەگەڵ چوارەم رۆژی شەڕی قورسی نێوان ئێران و ئیسرائیل، کە تێیدا هەردوولا ئامانجی ستراتیژیی یەکدییان پێکاوە.
هۆکاری سەرەکیی نیگەرانیی بازاڕەکان بۆ ئەوە دەگەڕێتەوە کە ئیسرائیل هێرشەکانی بۆ سەر کەرتی وزەی ئێران چڕکردووەتەوە و چەندین پاڵاوگەی نەوت و ژێرخانی وزەی ئەو وڵاتەی کردووەتە ئامانج. لە بەرامبەردا، ئێران لە چوارچێوەی ئۆپەراسیۆنی "بەڵێنی راست 3"دا بە مووشەکی بالیستی هێرشی کردووەتە سەر شارە گەورەکانی ئیسرائیل.
ئەم پەرەسەندنانە لە کاتێکدایە کە سەرکردەکانی وڵاتانی G7 لە کەنەدا لە کۆبوونەوەدان بۆ تاوتوێکردنی قەیرانەکە، بەڵام ناکۆکی لە نێوانیاندا هەیە.
لە ئەنجامی هێرشەکان، فڕۆکەخانەی بنگۆریۆن و تەواوی ئاسمانی ئیسرائیل داخراون. هاوکات، باڵیۆزخانەی ئەمریکا لە ئۆرشەلیم/قودس رایگەیاندووە، توانای یارمەتیدانی هاووڵاتیانی نییە بۆ دەرچوون لە وڵاتەکە، کە ئەمەش ئاستی مەترسییەکانی شەڕەکە نیشان دەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ