عەواتف نەعیم، ئەکتەر و نووسەری عێراقی
رووداو دیجیتاڵ
عەواتف نەعیم، ئەکتەر و نووسەری عێراقی، لەبارەی دووەمین فێستیڤاڵی نێودەوڵەتیی سینەمایی بەغدا، رایگەیاند، سازکردنی ئەم جۆرە بۆنە هونەرییانە ئاماژەیەکی روونە بۆ بوژانەوەی نیشتمان و جووڵەیەکی سینەمایی گرنگە کە لەلایەن گەنجانەوە بەڕێوەدەبرێت.
عەواتف نەعیم، کە وەک نووسەر، دەرهێنەر، رەخنەگر و ئەکتەر خزمەتی هونەری عێراقی کردووە، لە لێدوانێکی تایبەت بە رووداو، جەختی لەسەر بەهای سینەما کردەوە و گوتی: "ئەمە جەختکردنەوەیە لەسەر بەهای سینەما و گرنگییەکەی وەک پیشەسازییەکی ناوازە. بێگومان، هۆکارێکە بۆ پەیوەندی لەگەڵ ئەوانی دیکە و پیشاندانی کێشە و خەم و خەون و ئاواتەکان. سازکردنی لە عێراق، واتە ئاماژەیە بۆ بوژانەوەی نیشتمان".
ئەو هونەرمەندە بە ئاماژەدان بە ئامادەبوونی میوانی بیانی و جووڵەی گەنجان، گوتیشی: "پێشوازیکردنی خەڵک و جەماوەر و میوانداری لە دەرەوەی وڵات، واتە جووڵەیەکی سینەمایی باش هەیە، بەتایبەتی کە لەلایەن گەنجانەوە بەڕێوەدەبرێت. گەنجانی ناوازە کاردەکەن و شتی باش بۆ سینەمای عێراقی زیاد دەکەن. ئەمە جێگەی دڵخۆشییە".
سەبارەت بە کارە هونەرییەکانی خۆی، عەواتف نەعیم روونیکردەوە کە سەرەڕای دوورکەوتنەوەی لە سینەما، بەڵام لە کاری هونەری بەردەوامە و گوتی: "چەندین فیلمم هەیە، لەوانە (دەرگای ژمارە حەوت) کە پێشوازییەکی زۆر باشی لێکرا، هەروەها فیلمی (بەسیر) کە لە قۆناغەکانی کۆتاییدایە و زۆر گەشبینم پێی. واتە من جووڵەم هەیە و هەم، بەڵام شانۆ منی بردووە، من شەیدا و ئالوودەی شانۆم".
ئەو هونەرمەندە بە ئەزموونە زیاتر بۆ مەعد فەیاز، نێردراوی رووداو بۆ فیستیڤاڵەکە کرد و گوتی، نمایشکردنی فیلمی کلاسیکی (سەعید ئەفەندی) لە کردنەوەی فێستیڤاڵەکەدا بەرز نرخاند و گوتی: "ئەمە وەفایەکە، وەستانێکی وەفایە بۆ هونەرمەندانی گەورە کە کۆچی دواییان کردووە و ئێستا لێمان دوورن، بەڵام لە یادەوەری و ویژداندا ماونەتەوە. ئەمە شوێن پەنجەی وەفا و وەستانێکی جوانە".
دووەمین فێستیڤاڵی سینەمایی بەغدا، کە بە ناوی محەممەد شوکری جەمیل، دەرهێنەری دیاری عێراقی کراوە، لەلایەن سەندیکای هونەرمەندانی عێراق بە هاوبەشی لەگەڵ وەزارەتی رۆشنبیری، گەشتوگوزار و شوێنەواری عێراق رێکخراوە و تاوەکو 21ـی ئەیلوول بەردەوام دەبێت.
لە فێستیڤاڵەکەدا ژمارەیەکی بەرچاو لە ئەستێرە عەرەبەکان و سینەماکارانی عێراق، رەخنەگر و میدیاکاران و میوانانی بیانی ئامادەن. شاندی وڵاتانی وەک سعودیە، کوەیت، تونس، میسر، لوبنان، ئوردن، سووریا و مەغریب بەشدارن و فیلمەکان لە چەندین بەشی جیاوازدا نمایش دەکرێن، لەوانە فیلمی درێژی سینەمایی، کورتەفیلم، بەڵگەفیلم و ئەنیمەیشن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ