وێنەیەکی نوێی هونەرمەند زیاد ئەسعەد بڵاودەکرێتەوە

 

هونەرمەندی نێوداری کورد زیاد ئەسعەد، کە شێرکۆ بێکەسی شاعیر بە نەوڕەسی سپیی ئاواز و گۆرانیی کوردی ناساندوویەتی، لە دایکبووی هەولێرە و لە دوای راپەڕینەوە چووەتە وڵاتی سوێد، خاوەنی چەندین ئاواز و گۆرانییە و هەر لە سەرەتای دەرکەوتنییەوە هەوادارێکی زۆری هەبوو، بەتایبەتی لە نێو توێژی گەنجاندا، ئێستاش وەک هونەرمەندێکی گەورە و داهێنەر لای هۆگران و ئارەزوومەندانی گۆرانی کوردی ماوەتەوە. هەرچەندە لە ساڵی 2003ـەوە هیچ بەرهەمێکی خۆی نەبووە، بەڵام 140 ئاواز و تێکستی داوەتە هونەرمەندان و گوتوویانە.

 

عەبدولغەفار عەبدوڵڵا، کە رۆژنامەڤانێکی نزیکە لە هونەرمەند زیاد ئەسعەد، وێنەیەکی ناوبراوی بۆ رووداو ناردووە، گوتی، "وێنەکە لە هاوینی ئەمساڵ گیراوە، خۆی بۆ چەند هاوڕێیەکی ناردوویەتی، بۆ ئەوەی لە تەندروستیی دڵنیاببنەوە." 

 

عەبدولغەفار عەبدوڵڵا گوتیشی، "ئەمڕۆ قسەم لەگەڵ کردووە، ئەو دوای نەخۆشکەوتنی رۆژانە وەرزش دەکات و بەردەوامیشە لە نووسینی تێکست و دانانی ئاواز بۆ گۆرانیبێژان." 

 

زیاد ئەسعەد برای هونەرمەندی کۆچکردوو هاوتا ئەسعەدە، کە ئەمساڵ بە نەخۆشی کۆچی دوایی کرد.