سەیران عوسمان، هونەرمەندی رۆژهەڵاتی کوردستان
رووداو دیجیتاڵ
هونەرمەند سەیران عوسمان، بەر لە سازکردنی کۆنسێرتەکەی لە شاری زاخۆ، باس لە پەیوەندییە نزیکەکەی لەگەڵ هونەرمەند عەزیز وەیسی دەکات و دەڵێت: ئەو تەنیا خەزوورم نییە، بەڵکو وەک باوکم وایە.
سەیران عوسمان، بۆ رووداو دڵخۆشی خۆی پێشاندا کە بۆ یەکەمجار لە زاخۆ کۆنسێرت ساز دەکات و دەڵێت: "هەرچەندە کەشوهەوا زۆر ساردە و چەندین پارچە جلم لەبەرکردووە، بەڵام گەرموگوڕی خەڵک و شوێنەکە هەموو شتێکی بیر بردوینەتەوە".
لەبارەی پەیوەندیی لەگەڵ هونەرمەند عەزیز وەیسی، کە هاوکات خەزووریەتی، سەیران عوسمان بە سۆزەوە گوتی: "من و کاک عەزیز زۆر لە یەکدی نزیکین، ئەو شوێنی باوکمی بۆ پڕکردوومەتەوە. تەنیا بۆ کاری هونەری پێکەوە نین، بەڵکو لە ژیانی تایبەتیشدا بەردەوام وەک یەک خێزانین، زۆرتر وەک باوک و کچ پێکەوەین نەک تەنیا بۆ کاری هونەری و هەڵپەڕکێ".
سەیران ئاماژەی بەوەشکرد، عەزیز وەیسی رۆڵێکی سەرەکی لە کارە هونەرییەکانیدا دەگێڕێت و دوێتی نوێی لەگەڵدا دەبێت و بەرهەمێکیشی بۆ نەورۆز ئامادە دەکات، بە پێکەنینەوە گوتیشی: "کلیپکردن لەگەڵی ئەوەندە خۆشە و خەرجیی لەسەر من نییە، لە کۆتاییشدا دەڵێم کاکە لە یوتیوبی خۆم دایبنێم؟ ئێستا وا رێککەوتووین، کلیپێک بۆ یوتیوبەکەی من بێت و یەکێکیان بۆ ئەو بێت".
لەبارەی گوتنەوەی گۆرانیی شاد و هەڵپەڕکێئامێز جەختی کردەوە: "حەز ناکەم گۆرانی خەمگین بڵێم، دەمەوێت هەمووان پێکەوە هەڵپەڕین و کاتێکی خۆش بەسەر ببەین".
لە بەشێکی دیکەی قسەکانیدا، سەیران عوسمان بەراوردی کوڕەکەی و خەزووری کرد و گوتی: "زۆر لە باپیری دەچێت، چونکە بەردەوام حەزی لە هەڵپەڕینە و یەک چرکە دانانیشێت، وەک باپیری پڕ لە وزەیە و ئەکتیڤە". روونیشیکردەوە "کوڕەکەم ئەوەندە هیلاکی کردووم، نابینی چەند لاواز و داماوم".
بۆ پێشوازیکردن لە ساڵی نوێ، ئیدارەی سەربەخۆی زاخۆ، زنجیرە کۆنسێرتێک لە کۆرنیشی شارەکە سازدەکات و تاوەکو ئێستا ژمارەیەکی بەرچا لە هونەرمەندانی چوار پارچەی کوردستان بەشداربوونە. بەگوێرەی ئامارەکانی گەشتوگوزاری زاخۆ، پێشبینی دەکرێت ژمارەی گەشتیاران لەمساڵدا بگاتە یەک ملیۆن گەشتیار، کە ئەمەش ریکۆردێکی نوێیە بۆ ئەو شارە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ