هەڵەیەک روویدا! دووبارە هەوڵبدە
رووداو - تەندروستی
نەخۆشنامەی ئەم هەفتەیە بە چیرۆکی ئەو پیاوە دەستی پێکرد کە سینگئێشەی هەبووە و سەردانی زۆر پزیشک و فریاکەوتنی کردووە، پشکنینی دڵیان بۆ کردووە و دەرکەوتووە، هیچ کێشەیەک لە دڵی نییە، کەچی ئەو هەر گوتویەتی، سینگئێشەم هەیە؛ پاش بەدواداچوونی وردتر دەرکەوتووە، ئەوە ئازاری سینگ نییە، بەڵکو ئەوە ئازاری دڵەکزێیە و سووتانەوەی سوورێنچکە.
د. دیار حەمید خۆشناو، پسپۆڕی نەخۆشییەکانی هەرس و جگەر میوانی پۆدکاستەکەیە و لەبارەی کەیسەکەوە دەڵێت: دڵەکزێ گەڕانەوەی ترشەڵۆکی گەدەیە و ئەو ئازارەش لەبەر کزانەوەی سوورێنچک روودەدات کە نەخۆش وادەزانێت دڵە.
د. دیار حەمید خۆشناو گوتی، ئەوکاتەی نەخۆش دەرمانی دڵەکزێ دەخوات و هێشتا هەست بەوە دەکات کە دڵەکزێکەی ماوە، یان دەڕشێتەوە و کێشەی قوتدانی بۆ دروست دەبێت یانیش زۆرجار نەخۆش خۆراک لە سوورێنچکی گیر دەبێت. ئەوا پێویستی بە پشکنینی زیاترە و دۆخی دڵەکزێیەکەی مەترسیدارە.
لە خانمانی دووگیان دڵەکزێ باوە، ئەو پسپۆڕە باسی هۆکارەکەی دەکات دەڵێت: ''ناڕێکیی هۆرمۆنەکان و زیادبوونی پەستانی سک وا لە خانمەکە دەکات دڵەکزێی زیاتر بێت''، تەنانەت باسی کەسانی جگەرەکێش و قەڵەویش دەکات بەوەی کە دڵەکزێیان لەنێو باوە.
بەگوتەی ئەو پسپۆڕە، ئەگەر دڵەکزێ پشتگوێ بخرێت ئەوا؛
- کەسەکە تووشی سووتانەوەی گەدە دەبێت کە پێش قۆناخی شێرپەنجەیە.
- سوورێنچکی تەسک دەبێتەوە.
- کەسەکە تووشی رەبۆ و کۆکەی بەردەوام دەکات.
- کێشەی قوتدانی بۆ دروست دەبێت.
بەڵام ئەوەش باس دەکات کە ئەگەر دڵەکزێ زۆر بەردەوام بێت و چارەسەر نەکرێت ئەوا ئەگەری بوون بە شێرپەنجەی دەبێت، کە حاڵەتێکی زۆر دەگمەنە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ