رووداو - تەندروستی
زانکۆی کۆرنێل لە ئەمریکا ئامێرێکی بچووکی چاندنی دەمارەخانەیان دروستکردووە کە هێندەی دەنکە خوێیەکە، بەڵام دەتوانێت بۆ ماوەی زیاتر لە ساڵێک بە شێوەی بێتەل زانیاریی و چالاکییەکانی مێشک بگوازێتەوە.
ئەم ئامێرە کە ناوی (MOTE)ە، لەلایەن ئەلیۆشا مۆلنار، پرۆفیسۆر لە کۆلێژی ئەندازیاریی کارەبا و کۆمپیوتەر، و سون وو لی، پرۆفیسۆری یاریدەدەر لە زانکۆی تەکنەلۆژیی نانیانگ، سەرپەرشتی کراوە، ئامێرەکە بە تیشکی لەیزەری سوور و ژێر سوور کاردەکات کە بەبێ زیان بە شانەکانی مێشکدا تێدەپەڕن و زانیارییەکان بە بەکارهێنانی تیشکی ژێر سوور دەنێرێتەوە.
ئەلیۆشا مۆلنار، دەڵێت: "تا ئەو جێگەیەی ئێمە بزانین، ئەمە بچووکترین ئامێری چاندنی دەمارییە کە چالاکیی کارەبایی لە مێشکدا دەپێوێت و دواتر بە شێوەی بێتەل راپۆرتی دەکات."
درێژیی ئامێرەکە نزیکەی 300 مایکرۆنە و پانییەکەی 70 مایکرۆنە. توێژەران سەرەتا ئامێرەکەیان لەسەر خانە تاقیگەییەکان تاقیکردەوە و دواتر لە توێکڵی مێشکی مشکدا چاندیان، بۆ ماوەی ساڵێک، ئامێرەکە بە سەرکەوتوویی چالاکییە کارەباییەکانی دەمارەخانەکانی تۆمارکرد، لە کاتێکدا مشکەکان بە تەندروستی و چالاکی مانەوە.
مۆلنار، ئاماژەی بەوەشکرد کە ئامانج لەم کارە ئەوە بووە کە ئامێرەکە هێندە بچووک بێت کەمترین زیان بە مێشک بگەیەنێت، چونکە ئامێرە تەقلیدییەکان دەتوانن ببنە هۆی هەوکردن و وروژاندنی سیستەمی بەرگری. هەروەها وتیشی، پێکهاتەی ئامێرەکە رەنگە رێگە بدات لە کاتی سکانی MRI دا بۆ تۆمارکردنی کارەبایی مێشک بەکاربهێنرێت، کە لەگەڵ ئامێرە ئێستاییەکاندا ئەستەمە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ