هەڵەیەک روویدا! دووبارە هەوڵبدە
دکتۆر لونا خالید، پێشکێشکار - د. گەشاو عەبدوڵڵا، پسپۆڕی پێست. وێنە: رووداو
رووداو - تەندروستی
پسپۆڕێکی نەخۆشییەکانی پێست رایدەگەیێنێت، ئەوانەی پێستیان چەورە لە هاویندا شێدارکەرەوە و خاوێنکەرەوەی پێستی تایبەت بەکاربهێنن و هۆشداریش دەدات، ''بەبێ راوێژی پزیشک یاخود کەسانی شارەزا هیچ دەرمانێک بۆ پێست بەکارنەیەت''.
ئەمڕۆ پێنجشەممە 6ـی حوزەیرانی 2024 د. گەشاو عەبدوڵڵا، پسپۆڕی نەخۆشییەکانی پێست و جوانکاری لە بوولتەنی تەندروستیدا دەڵێت: لە تەمەنی شەش مانگییەوە ئاساییە دژەخۆر بەکاربێت و پێویستە رۆژانە لە پێست بدرێت.
د. گەشاو عەبدوڵڵا، پسپۆڕی نەخۆشییەکانی پێست و جوانکاری گوتی، بەهۆی ئەوەی لە وەرزی هاویندا پلەی گەرما و رێژەی شێ بەرزدەبنەوە بۆیە رژێنە چەورییەکان زیاتر چالاکدەبن و پێست ئارەقی زیاتر دەکاتەوە.
لە بەشێکی قسەکانیدا دەڵێت: ''دژەخۆر تەنیا بۆ کاتی خۆرەتاو یاخود بۆ کاتی نیوەڕۆ نییە، بەڵکو دەشێت کەشوهەوا باراناویش بێت و دژەخۆریش بەکاربهێنیت، تاوەکو ئەو تیشکە زیانبەخشانەی لەخۆرەوە دەردەدرێن، بەر پێست نەکەون و نەبنەهۆی کێشەکانی پێست بەتایبەت شێرپەنجە''.
پسپۆڕەکە روونی دەکاتەوە، ''لە هاویندا پێست زیاتر دووچاری ماندوویێتی و وشکبوونەوە دەبێت، ئەوانەشی پێستان چەورە کێشەی زیوانیان لەو وەرزەدا بۆ دروست دەبێت''.
بۆ رێگری کردن لە وشکبوونەوەی پێست و زیپکە لە وەرزی هاویندا، د. گەشاو عەبدوڵڵا ئەم رێنوێنییانە پێشنیازدەکات؛
1- زۆرخواردنەوەی ئاو.
2- بایەخدان بە خواردنی سەوزە و میوەکان بەتایبەت 'خەیار و شووتی'.
3- خاوێنکردنەوە و شۆردنی پێست.
4- بەکارهێنانی خاوێنکەرەوەی پێست لە شێوەی جێل یاخود کەف.
5- بەکارهێنانی سیرەمی دەوڵەمەند بە ڤیتامین C و ڤیتامین A.
6- بەکارهێنانی دژەخۆر (بە گوێرەی جۆری پێست).
رووداو بۆچوونی هاونیشتمانییانی لەبارەی وەرزی گەرم و سارد وەرگرتووە و هەندێکیان دەڵێن، زیاتر ئارەزووی وەرزە گەرمەکان دەکەن و هەندێکیشیان وەرزە ساردەکان.
یەکێک لە هاونیشتمانییەکان دەڵێت، ''لە کەشی گەرمدا زیاتر ئاسوودەم''، بەڵام یەکێکی دیکەیان گوتی، ''بەهۆی ئەوەی کە کارەبا کەمە لە هاویندا، حەزم لە زستانە''.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ