هەڵەیەک روویدا! دووبارە هەوڵبدە
رووداو - تەندروستی
پزیشکێکی چارەسەر و نەشتەرگەرییەکانی دەم و ددان چەند خوویەکی هەڵە بۆ پاککردنەوەی ددانەکان باس دەکات؛ ئاماژە بە چیلکەی دار و پەتی دوورینەوە دەکات و بە مەترسی ناویان دەبات.
دکتۆر سۆما سادق هەورامی، پزیشکی چارەسەر و نەشتەرگەرییەکانی دەم و ددان بە رووداوی راگەیاند، پاککردنەوەی نێوان ددانەکان بە کەلوپەلی نازانستی و رەق هۆکارێکی لەدەستدانی ددانەکانە و بەشێکی زۆری چارەخوازەکانمان ئەو کێشەیەیان هەیە.
دەقی وەڵامەکانی دکتۆر سۆما سادق هەورامی لەبارەی پاککردنەوەی نێوان ددانەکان بە هەڵە؛
رووداو: ئەو کەلوپەلە مەترسیدارانە چین کە بەکاردێن بۆ پاککردنەوە ددانەکان و مەترسییەکەیان چییە و ئەگەر بەکاربێن، دەبنە هۆی چی؟
دکتۆر سۆما هەورامی: چیلکەی دار، مادەی پلاستیکی تیژ، کاخەزی تەنک، نایلۆنی عەلاگەکان و زەرفی سەر ئاوە سەفەرییەکان یاخود ئەو داوەی بۆ دروومان بەکاردێت. ئەمانە هەمووی مەترسیدارن و ئەگەری تووشبوون بە هەوکردنی پووک و ددانەکان زیاد دەکەن.
رووداو: ئایا باشترین کەرستە بۆ پاککردنەوەی نێوان ددانەکان چییە؟
دکتۆر سۆما هەورامی: پەتی تایبەت بە خاوێنکردنەوەی نێوان ددانەکان یاخود فڵچەی بچووکی خاوێنکردنەوەی نێوان ددانەکان باشترینن.
رووداو: منداڵ نێوان ددانەکانی بە چی پاک بکرێتەوە؟ بە پەت یاخود چیلکەی دار یاخود چیلکەی پلاستیکی؟
دکتۆر سۆما هەورامی: لەنێو منداڵانیش پێویستە پەتی تایبەت بە ددانپاککردنەوە بەکاربێت.
رووداو: باشترین کات بۆ بەکارهێنانی پەتی ددانپاککردنەوە کەیە؟
دکتۆر سۆما هەورامی: دوای هەر نانخواردنێک و پێش خەوتنیش باشترین کاتن کە پێویستە بە پەتی تایبەت نێوان ددانەکان خاوێن بکرێتەوە، هەروەها دەبێت هەموو نێوان ددانەکان پاک بکرێتەوە، نەک تەنیا ئەو ددانانەی کەسەکە هەست دەکات خۆراکیان تێدا بەجێماوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ