هەڵەیەک روویدا! دووبارە هەوڵبدە
رووداو - تەندروستی
زۆرکەس لە جیاتی خواردنەوە گازیی ئاسایی کە شەکریی تێدایە، خواردنەوە گازیی دایت دەخۆنەوە، پسپۆڕانی تەندروستی دەڵێن، مەترسییە گەورەکە تەنیا شەکرەکە نییە، بەڵکو یەکێک لە زیانبەخشترین ئەو مادانەی تێیدایە، ترشی فۆسفۆڕیکە کە لانیکەم پێنج زیانی گەورەی تەندروستیی هەیە.
ترشی فۆسفۆڕیک مادەیەکی کیمیایی بێڕەنگ و بێبۆنە. لە کۆلا و زۆربەی خواردنەوە گازدارە رەشەکاندا هەیە تامی تیژ و کەمێک ترشی پێدەبەخشێت ئەوەیە کە لەکاتی خواردنەوەی کۆلا هەستی پێدەکەیت، ئەگەر ئەوە نەکرێتە نێو خواردنەوە گازییەکان تامێکی زۆر شیرینی ناخۆشی دەبێت.
ئەم مادەیە گەورەترین زیانی بۆ تەندروستی هەیە و ئەمەش زیانەکانی؛
1- لاوازکردن و پووکانەوەی ئێسک؛ جەستەی مرۆڤ پێویستیی بە هاوسەنگی هەیە لە نێوان (کالسیۆم) و (فۆسفۆر). کاتێک ترشی فۆسفۆڕیک زۆر دەخۆیت، رێژەی فۆسفۆڕ لە خوێندا بەرز دەبێتەوە. بەتایبەت لە خانمان.
ئەنجام: بۆ ئەوەی جەستە هاوسەنگییەکە رابگرێتەوە، ناچار دەبێت "کالسیۆم" لە ئێسکەکانەوە رابکێشێت بۆ نێو خوێن. ئەمەش دەبێتە هۆی ئەوەی ئێسکەکان بە تێپەڕبوونی کات لاواز و پووک بن و ئەگەری شکانیان زیاد بکات.
2- داخورانی مینای ددان؛ ترشی فۆسفۆڕیک مادەیەکی ترشە. کاتێک بەردەوام بەر ددانەکان دەکەوێت، چینە رەقە سپییەکەی دەرەوەی ددان کە پێی دەگوترێت مینا، دەتوێنێتەوە.
ئەنجام: ددانەکان زەرد دەبن، هەستیار دەبن بەرامبەر ساردی و گەرمی. زووتر کلۆر دەبن.
3- پەککەوتنی گورچیلەکان؛ گورچیلەکان بەرپرسن لە پاڵاوتنی مادە زیادەکانی نێو خوێن. بوونی بڕێکی زۆر لە فۆسفۆڕ پەستانی زۆر دەخاتە سەریان.
ئەنجام: توێژینەوەکان دەریانخستووە، ئەو کەسانەی خواردنەوە گازییەکان زۆر دەخۆنەوە، ئەگەری دروستبوونی بەردی گورچیلە و تووشبوون بە نەخۆشییە درێژخایەنەکانی گورچیلە تێیاندا زۆر زیاترە.
4- رێگریکردن لە مژینی مادە کانزاییەکان؛ جگە لە کالسیۆم، ترشی فۆسفۆڕیک دەکرێت ببێتە هۆی ئەوەی جەستە نەتوانێت بە باشی سوود لە مادە گرنگەکانی وەک مەگنیسیۆم، زینک و ئاسن وەربگرێت، چونکە لە گەدەدا لەگەڵیان یەکدەگرێت و دەیانکاتە دەرەوەی جەستە پێش ئەوەی جەستە هەڵیان بمژێت.
5- کێشەکانی گەدە و هەرسکردن؛ بەهۆی ئەوەی مادەیەکی ترشە، بۆ ئەو کەسانەی کێشەی گەدەیان هەیە (وەک دڵەکزێ یان برینی گەدە)، خواردنەوە دایتییەکان دەبنە هۆی زیادبوونی ئازار و تێکچوونی ترشەڵۆکی گەدە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ